పాట్నా: 2025 బీహార్ అసెంబ్లీ ఎన్నికల్లో ఆశించిన ఫలితాలు రాకపోవడంతో, ‘జన్ సురాజ్’ వ్యవస్థాపకుడు ప్రశాంత్ కిశోర్ తన వ్యూహాలను మార్చుకుంటున్నారు. ఇప్పుడు ఆయన తన నివాసాన్ని పాట్నాలోని బిహటాకు మారుస్తున్నారు.
బిహటాలో ‘బీహార్ నవ నిర్మాణ ఆశ్రమం’: బిహటాలో నూతనంగా నిర్మిస్తున్న ‘బీహార్ నవ నిర్మాణ ఆశ్రమం’లో ఇకపై ఆయన ఉండబోతున్నారు. 2030 బీహార్ అసెంబ్లీ ఎన్నికల్లో తన పార్టీ ‘జన్ సురాజ్’ బలమైన శక్తిగా ఎదిగే వరకు, వచ్చే ఐదేళ్ల పాటు అక్కడే ఉండి తన రాజకీయ కార్యకలాపాలను సాగించాలని ఆయన నిర్ణయించుకున్నారు.
నిర్మాణ పనులు జోరుగా: ఈ ఆశ్రమ నిర్మాణ పనులు యుద్ధ ప్రాతిపదికన జరుగుతున్నాయి. సుమారు 100 మందికి పైగా కార్మికులు గత కొన్ని రోజులుగా రేయింబవళ్లు శ్రమిస్తున్నారు. అక్కడ పనిచేస్తున్న కార్మికులకు వసతి, భోజన సౌకర్యాలను ప్రశాంత్ కిశోర్ స్వయంగా చూసుకుంటున్నారు. తరచూ అక్కడికి వచ్చి కార్మికులకు ఉత్సాహాన్ని ఇస్తున్నారు. అయితే, ఈ ఆశ్రమ నిర్మాణం ఎప్పటికి పూర్తవుతుందనే దానిపై ఇంకా స్పష్టత లేదు.
గతంలో ఎక్కడ ఉండే వారు? ఇంతకుముందు ప్రశాంత్ కిశోర్ తన రాజకీయ కార్యకలాపాలను పాట్నా విమానాశ్రయం సమీపంలోని ‘షేఖ్పురా హౌస్’ నుండి నిర్వహించేవారు. ఆ బంగళా జన్ సురాజ్ పార్టీ జాతీయ అధ్యక్షుడు, మాజీ ఎంపీ ఉదయ్ సింగ్ కుటుంబానికి చెందినది. ఉదయ్ సింగ్ కుటుంబానికి బీహార్ రాజకీయాల్లో మంచి ప్రాభవం ఉంది.