భోపాల్: మధ్యప్రదేశ్లో అత్యంత హైప్రొఫైల్ కేసుగా మారిన ‘ట్విషా శర్మ మృతి’ కేసులో పోలీసులకు కీలక పురోగతి లభించింది. ఈ కేసులో ప్రధాన నిందితుడు, మృతురాలి భర్త సమర్థ్ సింగ్ను శనివారం భోపాల్ జిల్లా కోర్టులో హాజరుపరచగా, న్యాయస్థానం అతడికి 7 రోజుల పోలీసు రిమాండ్ విధించింది.
ఏం జరిగింది? నిందితుడు సమర్థ్ సింగ్ను కస్టడీలోకి తీసుకున్న పోలీసులు, ట్విషా మరణానికి సంబంధించిన అసలు రహస్యాలను రాబట్టేందుకు విచారణ చేపట్టారు. ఈ 7 రోజుల్లో కేసులో మరిన్ని సంచలన విషయాలు వెలుగులోకి వచ్చే అవకాశం ఉంది. అంతకుముందు శుక్రవారం సమర్థ్ జబల్పూర్ కోర్టులో లొంగిపోయేందుకు ప్రయత్నించి డ్రామా సృష్టించగా, అక్కడే పోలీసులు అతడిని అదుపులోకి తీసుకున్నారు.
కోర్టులో డ్రామా: భోపాల్ కోర్టుకు నిందితుడిని తీసుకువస్తున్న సమయంలో పోలీసుల తీరుపై విమర్శలు వచ్చాయి. మీడియా కంట పడకుండా నిందితుడిని కోర్టు వెనుక ద్వారం గుండా పోలీసులు లోపలికి తీసుకెళ్లారు. ఈ సమయంలో కోర్టు ఆవరణలో కొంత గందరగోళం నెలకొంది.
జడ్జి కొడుకు చీకటి గదిలో..: జబల్పూర్ కోర్టులో లొంగిపోయే క్రమంలో నిందితుడు సమర్థ్ సింగ్ ఒక కోర్టు గదిలో లైట్లు ఆపి, మాస్క్ వేసుకుని దాక్కున్నట్లు ఆరోపణలు ఉన్నాయి. బాధిత పక్షం తరఫు సీనియర్ న్యాయవాది అనురాగ్ శ్రీవాస్తవ మాట్లాడుతూ.. రిటైర్డ్ జడ్జి కొడుకును రక్షించేందుకు తెరవెనుక పెద్ద కుట్ర జరుగుతోందని తీవ్ర ఆరోపణలు చేశారు. అప్పటికే జడ్జి లేని ఆ చీకటి గదిలో క్లర్కుల సమక్షంలో నిందితుడు దాక్కోవడం పట్ల ఆయన ఆగ్రహం వ్యక్తం చేశారు. నిందితుడిని భోపాల్ కోర్టులోనే లొంగిపోవాలని జబల్పూర్ కోర్టు ఆదేశించడంతో పోలీసులకు అవకాశం చిక్కింది.
మే 12 నాటి ఆ భయంకరమైన రాత్రి: నోయిడాకు చెందిన 31 ఏళ్ల ట్విషా శర్మకు, డిసెంబర్ 2025లో ‘షాదీ డాట్ కామ్’ ద్వారా సమర్థ్ సింగ్తో వివాహం జరిగింది. సమర్థ్ తల్లి గిరిబాల సింగ్ మాజీ జిల్లా మరియు సెషన్స్ జడ్జి. వివాహం తర్వాత ట్విషాను అత్తామామలు నిత్యం హింసించేవారని కుటుంబీకుల ఆరోపణ.
మే 12 రాత్రి ట్విషా తన తల్లికి ఫోన్ చేసి, “నన్ను ఇక్కడ చాలా వేధిస్తున్నారు, ఉద్యోగం మానేసినప్పటి నుండి నన్ను పనికిరాని దానివని హేళన చేస్తున్నారు” అని ఏడుస్తూ చెప్పింది. మాట్లాడటం పూర్తవ్వకముందే ఫోన్ కట్ అయ్యింది. సరిగ్గా రెండు గంటల తర్వాత, అత్త గిరిబాల సింగ్ ఫోన్ చేసి ట్విషా ఆత్మహత్య చేసుకుందని నిర్లిప్తంగా చెప్పడం అనుమానాలకు దారితీసింది.
వరకట్న హత్య కేసు నమోదు: ఇది ఆత్మహత్య కాదని, కచ్చితంగా హత్యేనని ట్విషా కుటుంబ సభ్యులు పోలీసులకు ఫిర్యాదు చేశారు. వరకట్నం కోసం ఆమెను వేధిస్తున్నారని ఆరోపించారు. దీని ఆధారంగా భర్త సమర్థ్ సింగ్, అత్త (మాజీ జడ్జి) గిరిబాల సింగ్లపై పోలీసులు వరకట్న హత్య కేసు నమోదు చేశారు. రిమాండ్లో ఉన్న నిందితుడిని విచారించడం ద్వారా మరణానికి కారణమైన వాస్తవాలను, తల్లి పాత్రను వెలికితీసే పనిలో పోలీసులు ఉన్నారు.