మహారాష్ట్ర: “నేను నిన్ను ఇక ఎప్పుడూ కొట్టను, మనం ప్రేమగా సంసారం చేసుకుందాం…” అని ప్రియుడు ఇచ్చిన మాటను నమ్మి తిరిగి వెళ్లిన 22 ఏళ్ల యువతి జీవితం విషాదాంతమైంది. కళ్యాణ్ సమీపంలోని అంబివలి-బనేలి ప్రాంతంలో, ప్రియుడు తన సహజీవన భాగస్వామిని రాత్రంతా హింసించి, అత్యంత క్రూరంగా హత్య చేసిన ఘటన వెలుగులోకి వచ్చింది. ఇంట్లో ఉన్న టీవీని, నీళ్ల చెంబును ఆమె తలపై మోపి ఈ దారుణానికి ఒడిగట్టాడు.
మృతురాలిని సారిక అలియాస్ రుక్సార్ (22)గా, నిందితుడిని సతీష్ అలియాస్ గుడ్డు వాఘేగా పోలీసులు గుర్తించారు. నిందితుడిని టిట్వాలా పోలీసులు అరెస్టు చేశారు.
నమ్మించి పిలిచి… రుక్సార్ మరియు సతీష్ గత రెండు మూడు ఏళ్లుగా అంబివలి ప్రాంతంలో సహజీవనం చేస్తున్నారు. అయితే, సతీష్ తరచుగా ఆమె ప్రవర్తనపై అనుమానంతో శారీరకంగా, మానసికంగా వేధించేవాడు. రెండు రోజుల క్రితం అతను చేసిన దాడిని తట్టుకోలేక రుక్సార్ తన తల్లిదండ్రుల ఇంటికి వెళ్లిపోయింది. శనివారం సాయంత్రం, “నేను ఇక ఎప్పుడూ నీపై చేయి చేసుకోను” అని అబద్ధపు హామీ ఇచ్చి ఆమెను సతీష్ తిరిగి ఇంటికి రప్పించాడు.
రాత్రంతా దాడి, చివరికి టీవీతో… తెల్లవారుజామున వారిద్దరి మధ్య మళ్లీ గొడవ జరిగింది. కోపంతో ఊగిపోయిన సతీష్, రుక్సార్ను కర్రతో, కాళ్లతో తీవ్రంగా కొట్టాడు. ఆమె అరుస్తున్నా కనికరించకుండా, ఇంట్లో ఉన్న టీవీని, నీళ్లతో నిండిన రాగి చెంబును ఆమె తలపై బలంగా మోపాడు. ఈ దాడిలో తీవ్ర రక్తస్రావమై రుక్సార్ అక్కడికక్కడే కుప్పకూలిపోయింది.
సమాచారం అందుకున్న బంధువులు ఆమెను టిట్వాలా గ్రామీణ ఆసుపత్రికి తరలించారు. అక్కడ ఆక్సిజన్ అందుబాటులో లేకపోవడంతో, వైద్యుల సూచన మేరకు ఉల్లాస్నగర్లోని సెంట్రల్ ఆసుపత్రికి తరలిస్తుండగా మార్గమధ్యలోనే ఆమె మరణించింది.
ఆసుపత్రి బయటే తిరుగుతున్న నిందితుడు: రుక్సార్ మరణ వార్త తెలిసిన తర్వాత, అదే ఆసుపత్రి ప్రాంగణంలో నిందితుడు సతీష్ నిర్భయంగా తిరుగుతుండటం గమనించిన బంధువులు ఆగ్రహంతో అతడిని చితకబాదారు. ఆ తర్వాత అతడిని టిట్వాలా పోలీసులకు అప్పగించారు.