బెంగళూరు: కర్ణాటక రాజకీయాల్లో బుధవారం అనూహ్య పరిణామాలు చోటుచేసుకున్నాయి. కాంగ్రెస్ ప్రధాన కార్యదర్శి, కర్ణాటక ఇన్ఛార్జ్ రణదీప్ సింగ్ సూర్జేవాలా హఠాత్తుగా ముఖ్యమంత్రి సిద్ధరామయ్య నివాసానికి చేరుకోవడంతో రాష్ట్రంలో రాజకీయ వాతావరణం వేడెక్కింది. రాష్ట్రంలో నాయకత్వ మార్పుపై గత కొంతకాలంగా జరుగుతున్న ఊహాగానాల నేపథ్యంలో ఈ సమావేశం అత్యంత ప్రాధాన్యత సంతరించుకుంది.
ఉప ముఖ్యమంత్రి డి.కె. శివకుమార్కు ముఖ్యమంత్రి పదవిని అప్పగించే దిశగా కాంగ్రెస్ అధిష్టానం మొగ్గు చూపుతోందనే చర్చ జోరుగా సాగుతోంది.
ముఖ్యమంత్రి నివాసంలో జరిగిన ఈ సమావేశంలో కర్ణాటక ప్రభుత్వ సీనియర్ మంత్రులు కె.జె. జార్జ్, జమీర్ అహ్మద్ ఖాన్ కూడా పాల్గొనడం రాజకీయ వర్గాల్లో మరింత ఉత్కంఠను రేపింది. ఢిల్లీ నుండి కాంగ్రెస్ హైకమాండ్ సందేశాన్ని మోసుకొచ్చిన సూర్జేవాలా, నాయకత్వ మార్పునకు మార్గం సుగమం చేసుకోవాలని సిద్ధరామయ్యకు సూచించినట్లు సమాచారం. పార్టీలో చాలా కాలంగా జరుగుతున్న అంతర్గత కుమ్ములాటలు ఇప్పుడు ఒక కీలక మలుపుకు చేరుకున్నట్లు తెలుస్తోంది.
కాంగ్రెస్ ప్రభుత్వం సగం పదవీకాలం పూర్తి చేసుకున్నప్పటి నుండి డి.కె. శివకుమార్ను ముఖ్యమంత్రిని చేయాలనే డిమాండ్లు వినిపిస్తూనే ఉన్నాయి. దీనిపై పార్టీ నాయకత్వ స్థాయిలో తీవ్ర చర్చలు జరుగుతున్నాయి. తుది నిర్ణయానికి ముందు మరికొన్ని కీలక చర్చలు జరిగే అవకాశం ఉందని సమాచారం. మరోవైపు, ముఖ్యమంత్రి సిద్ధరామయ్యకు మద్దతుగా పెద్ద సంఖ్యలో కార్యకర్తలు ఆయన నివాసం వద్దకు చేరుకున్నారు. పోలీసులు కొందరు మద్దతుదారులను అదుపులోకి తీసుకోవడంతో అక్కడ ఉద్రిక్తత నెలకొంది. విధాన సౌధ నుండి బయటకు వచ్చిన సిద్ధరామయ్యకు మద్దతుదారులు పెద్ద ఎత్తున నినాదాలతో ఘనస్వాగతం పలికారు.
శివకుమార్ మద్దతుదారుల సంబరాలు: ముఖ్యమంత్రి మార్పుపై జరుగుతున్న ఊహాగానాల మధ్య బుధవారం కర్ణాటకలోని పలు ప్రాంతాల్లో డి.కె. శివకుమార్ మద్దతుదారులు సంబరాలు చేసుకున్నారు. బెంగళూరులోని శివకుమార్ నివాసం వద్ద మరియు రామనగర జిల్లా కేంద్రంలో మద్దతుదారులు బాణసంచా కాల్చి, మిఠాయిలు పంచుకున్నారు. 2023 అసెంబ్లీ ఎన్నికల్లో శివకుమార్ చూపిన నాయకత్వ పటిమను వారు ఈ సందర్భంగా గుర్తు చేసుకున్నారు. “బిజెపి మరియు ఆర్ఎస్ఎస్ను సవాలు చేసి 130 సీట్లు గెలుచుకోవడంలో ఆయన కీలక పాత్ర పోషించారు,” అని ఒక మద్దతుదారుడు పేర్కొన్నారు. సిద్ధరామయ్య గురువారం కర్ణాటక గవర్నర్ థావర్చంద్ గెహ్లాట్కు తన రాజీనామాను సమర్పించవచ్చని కాంగ్రెస్ వర్గాల సమాచారం.
సిద్ధరామయ్య మద్దతుదారుల నిరసన: మరోవైపు, సిద్ధరామయ్య రాజీనామా చేస్తారనే వార్తలతో ఆయన మద్దతుదారులు బుధవారం నిరసనలకు దిగారు. సీఎం అధికారిక నివాసం ‘కావేరి’ వద్ద ఆందోళన చేస్తున్న వారిని పోలీసులు బస్సుల్లో ఎక్కించి తరలించారు. సిద్ధరామయ్య పదవి నుంచి తప్పుకుంటే పార్టీకి కోలుకోలేని దెబ్బ తగులుతుందని, అధిష్టానం కావాలనే సంక్షోభాన్ని సృష్టిస్తోందని నిరసనకారులు ఆరోపించారు. ఆయన అత్యంత ప్రజాదరణ కలిగిన నాయకుడని, ఆయనే సిఎంగా కొనసాగాలని వారు డిమాండ్ చేశారు.