ఫ్రాన్స్: ఫ్రాన్స్లో నలుగురు పిల్లల తల్లి అయిన ఒక 42 ఏళ్ల మహిళ, తన మాజీ ప్రియుడి చేతిలో ఏళ్ల తరబడి అనుభవించిన శారీరక, మానసిక హింస గురించి కోర్టులో వెల్లడించిన నిజాలు ప్రపంచాన్ని దిగ్భ్రాంతికి గురిచేశాయి. ఈ కేసులో నిందితుడికి కోర్టు 25 ఏళ్ల జైలు శిక్ష విధించింది.
బాధితురాలు లెటిసియా ఆర్., బ్యాంకు మేనేజర్గా పనిచేస్తున్న తన మాజీ ప్రియుడు గిల్యూమ్ బుక్కీ (Guillaume Bouche) 2015 నుండి 2022 వరకు తనను ఎలా బందీని చేసి, హింసించాడో కోర్టుకు వివరించింది. వీరిద్దరి మధ్య మొదలైన సాధారణ సంబంధం, కాలక్రమేణా గిల్యూమ్ యొక్క క్రూరమైన ప్రవర్తన వల్ల నరకంలా మారిందని ఆమె తెలిపింది.
వ్యక్తిగత వీడియోలతో బెదిరింపు: ఈ సంబంధం నుండి బయటపడాలని ప్రయత్నించినప్పుడల్లా, తన వ్యక్తిగత వీడియోలను బయటపెడతానని గిల్యూమ్ బెదిరించేవాడని లెటిసియా కన్నీరుమున్నీరుగా కోర్టులో చెప్పింది. ఆ భయంతోనే తాను ఇన్నాళ్లు మౌనంగా ఆ హింసను అనుభవించానని ఆమె పేర్కొంది.
487 మందితో బలవంతపు సంబంధం: తన ప్రియుడి ఒత్తిడి మేరకు స్నేహితులు, సహోద్యోగులు మరియు గుర్తుతెలియని వ్యక్తులతో కూడా తాను శారీరకంగా గడపాల్సి వచ్చిందని ఆమె సంచలన ఆరోపణలు చేసింది. కొన్నిసార్లు హైవేలపై ఉన్న పెట్రోల్ బంకుల వంటి బహిరంగ ప్రదేశాలలో కూడా అపరిచితులతో గడపాలని అతను తనను వేధించేవాడని తెలిపింది. లెటిసియా వాంగ్మూలం ప్రకారం, ఆమెను దాదాపు 487 మంది పురుషులతో బలవంతంగా సంబంధం పెట్టుకునేలా గిల్యూమ్ చేశాడని తేలింది. ఈ సుదీర్ఘకాల వేధింపుల వల్ల ప్రస్తుతం ఆమె తీవ్రమైన అనారోగ్య సమస్యలతో బాధపడుతోంది.
కోర్టు తీర్పు: ప్రభుత్వ తరపు న్యాయవాదులు నిందితుడికి జీవిత ఖైదు విధించాలని కోరగా, విచారణ అనంతరం కోర్టు గిల్యూమ్ బుక్కీకి 25 ఏళ్ల జైలు శిక్ష విధించింది. శిక్షా కాలంలో మూడింట రెండు వంతులు పూర్తయిన తర్వాతే పెరోల్ (పరోల్) ఇవ్వాలని కోర్టు షరతు విధించింది. అయితే, ఇదంతా ఇద్దరి అంగీకారంతో జరిగిన ‘ఆట’ అని నిందితుడు వాదించడం గమనార్హం.
ఇటీవల ఫ్రాన్స్లో సంచలనం సృష్టించిన ‘గిసెల్ పెలికోట్’ (Gisèle Pelicot) కేసు తీర్పు, తనపై జరిగిన అన్యాయాన్ని బయటపెట్టేలా తనకు ధైర్యాన్ని ఇచ్చిందని లెటిసియా పేర్కొనడం ఇప్పుడు చర్చనీయాంశంగా మారింది.