పాలి (రాజస్థాన్): పెళ్లయిన 20 రోజులకే కొత్త పెళ్లికూతురు అదృశ్యమైన ఘటన స్థానికంగా సంచలనం రేపింది. లక్షలు ఖర్చు చేసి పెళ్లి చేసుకున్న భర్త, ఇప్పుడు న్యాయం కోసం వేడుకుంటున్నాడు.
అసలేం జరిగింది? పంజాబ్లో మిఠాయి దుకాణం నడుపుతున్న జితేందర్ దాస్ (21), ఇర్షాద్ అనే వ్యక్తిని కలిశాడు. మంచి సంబంధం చూపిస్తానని నమ్మబలికిన ఇర్షాద్, ఇందుకోసం భారీగా ఖర్చు అవుతుందని చెప్పాడు. దీనికి అంగీకరించిన జితేందర్, పెళ్లి కోసం సుమారు 3.5 లక్షల రూపాయలు చెల్లించాడు. 2025, డిసెంబర్ 13న ప్రియాంక అనే యువతితో జితేందర్కు వివాహం జరిగింది.
కొద్ది రోజుల వరకు అంతా సజావుగానే సాగింది. అయితే, జనవరి 4న ఇర్షాద్ ఫోన్ చేసి, ప్రియాంక తండ్రి అనారోగ్యంతో ఉన్నాడని, ఆమెను వెంటనే పుట్టింటికి పంపాలని కోరాడు. దీంతో జితేందర్ తన భార్యను తీసుకుని వారణాసి వెళ్లాడు. అక్కడ నాలుగు రోజులు ఉన్నాక, జనవరి 8న తిరిగి పాలికి బయలుదేరారు.
ట్రైన్లో నాటకీయ పరిణామం: తిరుగు ప్రయాణంలో ఆగ్రా రైల్వే స్టేషన్ రాగానే, ప్రియాంక టాయిలెట్కు వెళ్తున్నానని చెప్పి బయలుదేరింది. ఎంతసేపటికీ ఆమె తిరిగి రాకపోవడంతో ఆందోళన చెందిన జితేందర్, రైలు మొత్తం వెతికినా ఫలితం లేకపోయింది. దళారీ ఇర్షాద్ను, అమ్మాయి తల్లిదండ్రులను సంప్రదించేందుకు ప్రయత్నించగా, వారి ఫోన్లు స్విచ్ ఆఫ్ వచ్చాయి.
తీరా ఇంటికి చేరుకున్నాక చూస్తే, బీరువాలో ఉన్న బంగారు నగలు మరియు 50 వేల రూపాయల నగదు కూడా మాయమయ్యాయని జితేందర్ గుర్తించాడు. ఇది ఒక పక్కా ప్రణాళికతో జరిగిన మోసమని గ్రహించిన బాధితుడు, కోర్టును ఆశ్రయించాడు. కోర్టు ఆదేశాల మేరకు పోలీసులు కేసు నమోదు చేసి విచారణ చేపట్టారు.