బెంగళూరు: బెంగళూరు ప్యాటరాయనపుర పోలీస్ స్టేషన్ పరిధిలో జరిగిన ఒక దారుణ హత్యోదంతం కర్ణాటక రాష్ట్రవ్యాప్తంగా సంచలనం రేపింది. సోషల్ మీడియా ద్వారా చిగురించిన వివాహేతర సంబంధం, చివరకు ఒక పక్కా ప్లాన్ ప్రకారం జరిగిన హత్యతో ముగిసింది.
అసలేం జరిగింది? రామనగర జిల్లాకు చెందిన మహమ్మద్ కాసిమ్ (27) అనే వ్యక్తికి, అర్పియా కౌసర్ అనే మహిళతో ఏడేళ్లుగా ప్రేమాయణం ఉంది. అయితే, మూడు ఏళ్ల క్రితం అర్పియాకు మహమ్మద్ అక్బర్ అనే వ్యక్తితో వివాహం జరిగింది. పెళ్లయిన తర్వాత అర్పియా తన భర్తతో కలిసి బెంగళూరులో నివాసం ఉంటోంది. అయినప్పటికీ, ఆమె తన మాజీ ప్రేమికుడు కాసిమ్తో సోషల్ మీడియా ద్వారా పరిచయాన్ని కొనసాగిస్తూ, అక్రమ సంబంధాన్ని పెట్టుకుంది.
భర్తకు తెలిసి.. భార్య ప్రవర్తనపై అనుమానం వచ్చిన అక్బర్, ఆమెను పలుమార్లు హెచ్చరించాడు. కానీ, ఆమె అతని మాటలను పట్టించుకోకుండా రహస్యంగా కాసిమ్తో కలుస్తూనే ఉంది. ఈ క్రమంలో, మే 25న కాసిమ్ తన ప్రియురాలిని కలిసేందుకు ఆమె ఇంటికి వచ్చాడు. ఈ విషయం ముందే తెలుసుకున్న భర్త అక్బర్, తన బంధువులను వెంటబెట్టుకుని వచ్చి, రెడ్ హ్యాండెడ్గా కాసిమ్ను పట్టుకున్నాడు.
దారుణ హత్య: అక్బర్ మరియు అతని బంధువులు కాసిమ్ను తీవ్రంగా కొట్టారు. గాయాలపాలైన కాసిమ్ రామనగరలోని ప్రభుత్వ ఆసుపత్రిలో చికిత్స పొందుతూ మరణించాడు. పోలీసులు కేసు నమోదు చేసి విచారణ చేపట్టగా, ఈ హత్యలో షాకింగ్ నిజం బయటపడింది. కాసిమ్ను తన ఇంటికే రప్పించి, తన భర్తకు దొరికిపోయేలా చేసింది స్వయానా అతని ప్రియురాలేనని తేలింది.
నిందితుల అరెస్టు: ప్రియుడిని అడ్డు తొలగించుకోవడానికి తన భర్తతోనే ఈ హత్య చేయించిన అర్పియా కౌసర్, ఆమె భర్త అక్బర్, మరియు దాడిలో పాల్గొన్న అక్బర్ బంధువులు ఒవైస్ వాసా, మహమ్మద్ చాంద్ పాషాలను పోలీసులు అరెస్టు చేసి జైలుకు తరలించారు.