క్రైమ్ న్యూస్: కర్ణాటకలోని తుమకూరు జిల్లా, కొరటగెరె పరిధిలోని కోలాల గ్రామంలో ఒక మహిళ మృతదేహాన్ని ముక్కలుగా చేసి ప్లాస్టిక్ సంచులలో రోడ్డు పక్కన పడవేసిన ఘటన తీవ్ర కలకలం రేపింది.
అసలేం జరిగింది? ఆగస్టు 7న రోడ్డు పక్కన పడి ఉన్న ఏడు ప్లాస్టిక్ సంచులను చూసిన స్థానికులు, అందులో మహిళా శరీర భాగాలు ఉండటాన్ని గమనించి పోలీసులకు సమాచారం అందించారు. వెంటనే రంగంలోకి దిగిన కొరటగెరె పోలీసులు గాలింపు చేపట్టగా, ఆగస్టు 8న మరో ఏడు సంచులు లభ్యమయ్యాయి. అందులో మహిళ తల మరియు మిగిలిన శరీర భాగాలు ఉన్నాయి. ఆ తల ఆధారంగా బాధితురాలిని గుర్తించినట్లు పోలీసులు భావిస్తున్నారు, అయితే అధికారిక ధృవీకరణ రావాల్సి ఉంది.
ప్రత్యేక బృందాల గాలింపు: తుమకూరు ఎస్పీ అశోక్ కె.వి. ఆదేశాల మేరకు ప్రత్యేక బృందాలను ఏర్పాటు చేసి కోలాల గ్రామం మరియు పరిసర ప్రాంతాల్లో విస్తృతంగా గాలిస్తున్నారు. హంతకులు కారులో వచ్చి ఈ ముక్కలను రోడ్డు వెంబడి వేర్వేరు చోట్ల పడవేసి ఉంటారని పోలీసులు అనుమానిస్తున్నారు. మహిళను వేరే ఎక్కడో హత్య చేసి, మృతదేహాన్ని ముక్కలుగా కోసి ఇక్కడ పడవేసినట్లు ప్రాథమిక దర్యాప్తులో తేలింది. భారీ వర్షం కారణంగా మిగిలిన భాగాల కోసం జరుపుతున్న గాలింపునకు ఆటంకం కలుగుతోంది. హంతకులు ఎవరు, హత్యకు గల కారణాలేంటనే కోణంలో దర్యాప్తు కొనసాగుతోంది.
మరొక దారుణం: వృద్ధురాలి హత్య తూర్పు సింగ్భూమ్ జిల్లాలోని బోడమ్లో మరో దారుణ ఘటన వెలుగుచూసింది. భావీ సింగ్ (60) అనే వృద్ధురాలిని ముగ్గురు మహిళలు కలిసి ‘డైన్-బిసాహి’ (చేతబడి అనుమానం) పేరుతో దారుణంగా నరికి చంపారు. జంషెడ్పూర్కు 22 కి.మీ దూరంలో ఉన్న ధోబనీ అడవిలో మృతదేహాన్ని స్వాధీనం చేసుకున్న పోలీసులు, ఆమె కుమారుడు సుధీర్ సింగ్ ఫిర్యాదు మేరకు కేసు నమోదు చేసి దర్యాప్తు చేస్తున్నారు.