అజ్మీర్: అజ్మీర్లోని బోరాడా ప్రాంతంలో గురువారం ఉదయం ఒక స్కార్పియో కారు దగ్ధమవుతుండటం చూసి స్థానికులు భయాందోళనకు గురయ్యారు. కారులో మూడు అస్థిపంజరాలు, పక్కనే ఉన్న పొలంలో తీవ్ర గాయాలతో ఉన్న ఒక మహిళ కనిపించడం సంచలనం రేపింది. మొదట ఇది రోడ్డు ప్రమాదమని అందరూ భావించినా, పోలీసుల దర్యాప్తులో ‘దృశ్యం’ సినిమాను తలపించే దారుణమైన నిజాలు బయటపడ్డాయి.
అసలేం జరిగింది? మాజీ సర్పంచ్ రామ్సింగ్ చౌదరి ఫామ్హౌస్లో ఈ కుటుంబం నివసిస్తోంది. రామ్సింగ్ తన రెండో భార్యతో విలాసంగా గడుపుతూ, మొదటి భార్య సునీత మరియు ఆమె పిల్లలను నిత్యం వేధించేవాడు. తండ్రి వేధింపులు భరించలేక, ప్రతీకారం తీర్చుకోవాలని నిర్ణయించుకున్న అతని మైనర్ కుమారుడు కొన్ని నెలల క్రితమే ప్లాన్ సిద్ధం చేసుకున్నాడు.
హత్యకు ముందు.. బుధవారం రామ్సింగ్ తన కొడుకును తీవ్రంగా కొట్టడంతో, ఆ రాత్రే తన తండ్రిని అంతం చేయాలని బాధితుడు నిర్ణయించుకున్నాడు. ఆ రాత్రి 8 గంటలకు బీర్ బాటిళ్లు తెచ్చాడు. రామ్సింగ్ తన రెండో భార్యతో కలిసి మద్యం తాగుతుండగా, మొదటి భార్య సునీతను కూడా బలవంతంగా తాగమని వేధించాడు. ఈ అవమానంతో రగిలిపోయిన కుమారుడు, అర్ధరాత్రి తన తల్లిని, సోదరిని నిద్రలేపి, “ఈరోజుతో తండ్రి కథ ముగియాలి” అని చెప్పాడు. వారు కూడా ఆ వేధింపుల నుండి విముక్తి పొందేందుకు అంగీకరించారు.
మారణకాండ.. తెల్లవారుజామున 4 గంటలకు రామ్సింగ్, రెండో భార్య సుర్జ్ఞాన్ నిద్రిస్తుండగా, మైనర్ కొడుకు రామ్సింగ్ గొంతు కోశాడు. ఆ తర్వాత రెండో భార్యపై కూడా దాడి చేశాడు. ఈ శబ్దాలు విని వచ్చిన తన సొంత నానమ్మ పూసీ దేవిని, అక్క మహిమను చూసి, ఈ విషయం బయటపడకూడదని వారిని కూడా కత్తులతో పొడిచి చంపేశారు.
సాక్ష్యాలు లేకుండా.. నలుగురిని చంపిన తర్వాత, మృతదేహాలను స్కార్పియో కారులో పెట్టి, 500 మీటర్ల దూరంలో ఉన్న హైవే వద్దకు తీసుకెళ్లి డీజిల్ పోసి తగులబెట్టారు. ప్రమాదమని నమ్మించాలని వారి ప్రయత్నం. అయితే, కారు తలుపు తెరుచుకుని బయటపడిన రెండో భార్య సుర్జ్ఞాన్ కొంతసేపు తడబడుతూ మరణించింది.
పోలీసుల ‘మాస్టర్ స్ట్రోక్’: పోలీసులు ఘటనా స్థలిని పరిశీలించినప్పుడు, కారు తగలబడిన తీరు అనుమానాస్పదంగా అనిపించింది. ఫామ్హౌస్లో కూడా రక్తం మరకలను తుడిచిన ఆనవాళ్లు కనిపించాయి. కఠినంగా విచారించగా, అసలు విషయం బయటపడింది. హత్య చేసిన మైనర్ కుమారుడిని పోలీసులు అదుపులోకి తీసుకోగా, అతనికి సహకరించిన తల్లి సునీత, సోదరిని పోలీసులు అరెస్టు చేసి జైలుకు పంపారు.