అమెరికాలోని జార్జియా రాష్ట్రానికి చెందిన ఓ హైస్కూల్ ఉపాధ్యాయురాలు, 16 ఏళ్ల విద్యార్థితో అక్రమ లైంగిక సంబంధం పెట్టుకున్నారనే ఆరోపణలతో అరెస్టయ్యారు. ఇద్దరి మధ్య దాదాపు 20 వేల అసభ్యకర సందేశాలు మార్పిడి కావడంతో పాటు, విద్యార్థిని తనతో కలిసి మెక్సికోకు పారిపోవాలని ఆమె కోరినట్లు దర్యాప్తులో వెల్లడైంది.
రోస్వెల్ హైస్కూల్లో ఉపాధ్యాయురాలిగా, అనంతరం అడ్మినిస్ట్రేటర్గా పనిచేసిన అమండా కాట్జ్ (55) పై ఈ కేసు నమోదు అయ్యింది. ఆమెపై నమోదైన ఆరోపణలు రుజువైతే గరిష్టంగా 20 సంవత్సరాల వరకు జైలు శిక్ష పడే అవకాశం ఉందని అధికారులు తెలిపారు.
పోలీసుల అఫిడవిట్ ప్రకారం, ఆ విద్యార్థి దర్యాప్తు అధికారులకు ఇచ్చిన వాంగ్మూలంలో తాను ఉపాధ్యాయురాలితో అనేకసార్లు లైంగిక సంబంధం కలిగి ఉన్నట్లు తెలిపాడు. ఈ ఘటనలు ఎక్కువగా ఆమె ఇంట్లో, అలాగే ఆమె జాగ్వార్ కారు వెనుక సీటులో జరిగాయని వెల్లడించాడు.
తాను పట్టుబడి జైలుకు వెళ్లిపోతాననే భయం ఉన్నప్పటికీ, అమండా ఈ సంబంధాన్ని కొనసాగించినట్లు దర్యాప్తులో తేలింది. వాలెంటైన్స్ డే సందర్భంగా ఆమె విద్యార్థి కుటుంబాన్ని ఒక విహారయాత్రకు ఆహ్వానించగా, ఆ సమయంలో బాలుడి తల్లి వారి మధ్య జరిగిన అనేక అనుమానాస్పద సందేశాలను గుర్తించింది. దీంతో ఈ వ్యవహారం బయటపడింది.
కుటుంబ సభ్యులు అర్ధరాత్రి అక్కడి నుంచి వెళ్లిపోయిన తర్వాత, అమండా తీవ్ర ఆవేదనకు గురైనట్లు తెలుస్తోంది. విద్యార్థిని ఇక చూడలేననే బాధతో సహోద్యోగుల వద్ద తన మనస్తాపాన్ని వ్యక్తం చేసినట్లు నివేదికలు చెబుతున్నాయి.
దర్యాప్తులో క్రిస్మస్ నుంచి వాలెంటైన్స్ డే వరకు ఇద్దరి మధ్య 19,585 సందేశాలు మార్పిడి అయినట్లు గుర్తించారు. వాటిలో అనేక సందేశాల్లో విద్యార్థిపై తనకు గాఢమైన ప్రేమ ఉందని అమండా పేర్కొంది.
ఇతర సందేశాల్లో తమ సంబంధం “అద్భుతంగా ఉందని”, అతనితో కలిసి ఉండేందుకు తాను “అన్నింటినీ వదులుకుంటానని” కూడా ఆమె రాసినట్లు పోలీసులు వెల్లడించారు.
తర్వాత విద్యార్థి దూరంగా ఉండటానికి ప్రయత్నించగా, అమండా వరుసగా ఆందోళనతో కూడిన సందేశాలు పంపినట్లు కేసు పత్రాల్లో పేర్కొన్నారు. ఒక సందేశంలో, “నేను నిన్ను ప్రేమించాను. నా జీవితంలో జరిగిన అత్యంత భయంకరమైన విషయం ఇదే” అని ఆమె రాసినట్లు వెల్లడైంది.
అలాగే, విద్యార్థితో కలిసి మెక్సికోకు వెళ్లాలని తాను భావించినట్లు కూడా ఆమె చెప్పినట్లు దర్యాప్తు అధికారులు పేర్కొన్నారు. అయితే ఆ ప్రతిపాదనపై విద్యార్థికి ఆసక్తి లేదని సమాచారం.
ప్రాథమిక విచారణ అనంతరం సెలవుపై పంపబడిన అమండా కాట్జ్, ఏప్రిల్ 30న తన ఉద్యోగానికి రాజీనామా చేశారు. ప్రస్తుతం ఆమెకు 25,000 డాలర్ల బెయిల్ మంజూరు చేయబడింది.