పుదుచ్చేరిలో యువతి మృతి కేసులో ఊహించని మలుపు చోటుచేసుకుంది. ఆమె రహస్య ప్రియుడిని పోలీసులు అరెస్ట్ చేశారు. కొట్టి చంపేసి, ప్రమాదంగా చిత్రీకరించి నాటకమాడిన నిందితుడు పోలీసులకు ఎలా దొరికాడో తెలుసుకుందాం.
పుదుచ్చేరిలోని తిలకర్ నగర్కు చెందిన 25 ఏళ్ల రాజమాతంగి అనే యువతికి శరవణన్ అనే వ్యక్తితో వివాహమైంది. అతను చెన్నైలో ఉంటూ ఫోటోగ్రాఫర్గా పనిచేస్తున్నాడు.
ఈ నెల 2వ తేదీన రాజమాతంగి తలకు తీవ్ర గాయాలైన స్థితిలో ఒక వ్యక్తి ఆమెను కదిర్కామం ప్రభుత్వ ఆసుపత్రిలో చేర్చాడు. వైద్యులు విచారించగా, అతను తన భర్త అని రాజమాతంగి చెప్పింది. మురుగా థియేటర్ వద్ద జరిగిన రోడ్డు ప్రమాదంలో తనకు గాయాలయ్యాయని ఆమె తెలిపింది. వైద్యులు ఆమెను పరీక్షించగా తలకు బలమైన గాయం తగలడంతో పాటు, ఆమె 3 నెలల గర్భిణి అని తేలింది. దీంతో ఆమెను ఆసుపత్రిలోనే ఉండి చికిత్స తీసుకోమని వైద్యులు సూచించారు. కానీ, రాజమాతంగి తనకు ఆరోగ్యం బాగానే ఉందని చెప్పి ఇంటికి వెళ్ళిపోయింది.
ఇంటికి వెళ్లిన కొద్దిసేపటికే ఆమె స్పృహతప్పి పడిపోయింది. వెంటనే రాజమాతంగి తల్లి ఆమెను మళ్లీ కదిర్కామం ప్రభుత్వ ఆసుపత్రికి తరలించారు. ఈసారి పరీక్షించినప్పుడు ఆమె శరీరం అంతటా గాయాలు ఉన్నట్లు వైద్యులు గుర్తించారు.
దీనిపై గోరిమేడు ట్రాఫిక్ పోలీసులకు సమాచారం అందించారు. ఆసుపత్రిలో చికిత్స పొందుతూ రాజమాతంగి రెండు రోజుల క్రితం పరిస్థితి విషమించి మృతి చెందింది. అనంతరం పోలీసులు ఘటనా స్థలానికి సంబంధించిన సీసీటీవీ దృశ్యాలను పరిశీలించగా, మురుగా థియేటర్ సమీపంలో ఎలాంటి ప్రమాదం జరగలేదని తేలింది.
దీంతో పోలీసులు రంగంలోకి దిగి రాజమాతంగిని ఆసుపత్రికి తీసుకువచ్చిన వాహనం నంబర్, ఆమెతో ఉన్న వ్యక్తి ఎవరు? అనే కోణంలో విచారణ చేపట్టారు. విచారణలో రాజమాతంగిని ఆసుపత్రికి తీసుకువచ్చిన వ్యక్తి చిన్న కోటకుప్పానికి చెందిన 29 ఏళ్ల సురేంద్రన్ అని తేలింది. వెంటనే పోలీసులు అతడిని అదుపులోకి తీసుకుని విచారించగా పలు షాకింగ్ నిజాలు వెలుగులోకి వచ్చాయి.
రాజమాతంగికి పెళ్లికాకముందు, పాఠశాల రోజుల నుంచే సురేంద్రన్తో ప్రేమాయణం సాగింది. వీరి ప్రేమను వ్యతిరేకించిన రాజమాతంగి తల్లిదండ్రులు, ఆమెకు శరవణన్తో వివాహం జరిపించారు.
పెళ్లయ్యాక శరవణన్-రాజమాతంగి దంపతులు చెన్నైలో నివసించేవారు. మరోవైపు ఆమె ప్రియుడు సురేంద్రన్ సింగపూర్కు వెల్డింగ్ పని కోసం వెళ్ళిపోయాడు. కొన్ని నెలల క్రితమే అతను తిరిగి చిన్న కోటకుప్పం వచ్చాడు.
విదేశాల నుంచి వచ్చిన తర్వాత సురేంద్రన్, తన మాజీ ప్రేమికురాలు రాజమాతంగితో మళ్లీ సంబంధాన్ని కొనసాగించాడు. వీరిద్దరూ తరచూ చెన్నై, పుదుచ్చేరిలలో కలిసి తిరిగేవారు. ఈ విషయం తెలుసుకున్న భర్త శరవణన్, భార్యను గద్దించాడు. అయితే, వారు శరవణన్ను కలిసి తమకు విడాకులు ఇవ్వాలని బ్రతిమిలాడారు.
దీంతో మనస్తాపానికి గురైన శరవణన్, భార్యను పుదుచ్చేరిలోని తిలకర్ నగర్ ఇంట్లో వదిలేసి చెన్నై వెళ్లిపోయాడు. ఇది ప్రియుడిని కలవడానికి అనుకూలంగా మారడంతో రాజమాతంగి తరచూ సురేంద్రన్తో కలిసి తిరిగేది. సురేంద్రన్ ఫోన్ ఎత్తకపోతే, ఆమె నేరుగా అతని ఇంటికి వెళ్లి గొడవ పడటాన్ని అలవాటుగా మార్చుకుందని తెలుస్తోంది.
ఇదే క్రమంలో గత 2వ తేదీన రాజమాతంగి, సురేంద్రన్ ఇంటికి వెళ్లింది. పరాయి భార్య ఇలా తమ ఇంటికి రావడం ఏంటని సురేంద్రన్ తల్లి ఆమెను తిట్టింది. దానికి రాజమాతంగి ఎదురు తిరిగి వాగ్వాదానికి దిగింది. అది చూసి ఆగ్రహం తట్టుకోలేకపోయిన సురేంద్రన్, తన రహస్య ప్రియురాలిపై విచక్షణారహితంగా దాడి చేశాడు. ఆ దెబ్బల తట్టుకోలేక ఆమె పరిగెడుతుండగా కాలువలో పడిపోయింది, దీంతో తలకు బలమైన గాయమైంది. ఆ తర్వాతే ఆమెకు ప్రమాదం జరిగిందని నమ్మించేందుకు ఆసుపత్రికి తీసుకెళ్లారు.
ఆ సమయంలో సురేంద్రన్ తన అసలు పేరును దాచి, రాజమాతంగి భర్త శరవణన్గా చలామణి అయ్యాడని పోలీసుల విచారణలో తేలింది. దీనిపై కేసు నమోదు చేసిన గోరిమేడు పోలీసులు సురేంద్రన్ను అరెస్ట్ చేసి జైలుకు తరలించారు. వివాహితను కొట్టి చంపి, ప్రమాదంలో చనిపోయినట్లు నాటకమాడిన సీక్రెట్ ప్రియుడు సీసీటీవీ ఆధారంగా దొరికిపోవడం పుదుచ్చేరిలో తీవ్ర కలకలం రేపింది.