ఇదే సరైన సమయం.. వివాదంలో చిక్కుకున్న బెన్ స్టోక్స్; కెప్టెన్‌పై వేటు వేసిన ఇంగ్లాండ్ జట్టు!

లండన్: న్యూజిలాండ్ జట్టుతో రెండో టెస్ట్ మ్యాచ్ ప్రారంభానికి ముందే ఇంగ్లాండ్ క్రికెట్ జట్టులో ఒక భారీ వివాదం చెలరేగింది.

జట్టు కెప్టెన్, స్టార్ ఆల్ రౌండర్ బెన్ స్టోక్స్ మరియు ఫాస్ట్ బౌలర్ గస్ అట్కిన్సన్‌లను ఇంగ్లాండ్ జట్టు నుండి సంచలనంగా తొలగించారు. ఇంగ్లాండ్ జట్టు నిబంధనలను ఉల్లంఘించి లండన్‌లోని ఒక నైట్ క్లబ్‌కు వెళ్లడం, అక్కడ జరిగిన గొడవలో చిక్కుకోవడమే ఈ క్రమశిక్షణా చర్యకు ప్రధాన కారణం. ఈ పరిణామాల నేపథ్యంలో, న్యూజిలాండ్‌తో జరగబోయే రెండో టెస్ట్ మ్యాచ్‌కి ఇంగ్లాండ్ తాత్కాలిక కెప్టెన్‌గా మాజీ కెప్టెన్ జో రూట్‌ను మళ్లీ నియమించారు.

అసలేం జరిగింది?: లార్డ్స్ మైదానంలో న్యూజిలాండ్‌తో జరిగిన మొదటి టెస్ట్ మ్యాచ్‌లో ఇంగ్లాండ్ జట్టు 115 పరుగుల తేడాతో ఘనవిజయం సాధించింది. ఈ విజయం తర్వాత, సోమవారం తెల్లవారుజామున ఈ వివాదం చోటుచేసుకుంది. ఇంగ్లాండ్ క్రికెట్ బోర్డు విధించిన అర్ధరాత్రి కర్ఫ్యూ (నైట్ రూల్స్) నిబంధనలను ఉల్లంఘించి బెన్ స్టోక్స్, అట్కిన్సన్ లండన్‌లోని ఒక నైట్ క్లబ్‌కు వెళ్లారు.

అక్కడ రగ్బీ ఆటగాడు ‘తోతోవా అవ్వా’ అనే వ్యక్తితో జరిగిన ఘర్షణలో, ఇంగ్లాండ్ జట్టు భద్రతా సిబ్బంది ఒకరికి తీవ్ర గాయాలయ్యాయి. అతనికి కుట్లు పడే పరిస్థితి వచ్చింది. ఈ ఘటనపై ఇంగ్లాండ్ క్రికెట్ బోర్డు (ECB) మరియు క్రమశిక్షణా కమిటీ తీవ్రమైన దర్యాప్తును ప్రారంభించాయి.

జో రూట్‌కు మళ్లీ కెప్టెన్సీ బాధ్యతలు: విచారణ ఇంకా కొనసాగుతుండటంతో, స్టోక్స్ మరియు అట్కిన్సన్ ఇద్దరినీ ఇంగ్లాండ్ బోర్డు జట్టు నుండి సస్పెండ్ చేసింది. జట్టు వైస్ కెప్టెన్‌గా హ్యారీ బ్రూక్ ఉన్నప్పటికీ, అతను కూడా గత ఏడాది ఇలాంటి వివాదంలోనే చిక్కుకున్నాడు. దీంతో అనుభవజ్ఞుడైన జో రూట్‌కు కెప్టెన్సీ బాధ్యతలను తాత్కాలికంగా అప్పగించారు.

2022లో కెప్టెన్ పదవి నుండి తప్పుకున్న జో రూట్, దాదాపు నాలుగేళ్ల తర్వాత మళ్లీ ఇంగ్లాండ్ జట్టును నడిపించనున్నారు. ఈ నైట్ క్లబ్ వివాదంతో తీవ్ర మానసిక ఒత్తిడికి గురైన బెన్ స్టోక్స్, తన కెప్టెన్సీ పదవికి రాజీనామా చేయాలా లేదా అంతర్జాతీయ క్రికెట్ నుండి తాత్కాలికంగా విరామం తీసుకోవాలా అనే కోణంలో ఆలోచిస్తున్నట్లు ఇంగ్లాండ్ మీడియా పేర్కొంది.

జూన్ 17న ఓవల్ మైదానంలో ప్రారంభం కానున్న రెండో టెస్ట్ మ్యాచ్‌కు ముందు ఇంగ్లాండ్ జట్టులో జరిగిన ఈ అంతర్గత ఘర్షణ క్రికెట్ ప్రపంచంలో తీవ్ర కలకలం రేపింది. బెన్ స్టోక్స్, అట్కిన్సన్ స్థానాల్లో జోఫ్రా ఆర్చర్, జోర్డాన్ కాక్స్‌లను జట్టులోకి తీసుకున్నారు.