ప్రేమ వల విసురుతున్న రష్యా..! “అందాల వలలో చిక్కి సైనిక రహస్యాలు చేరవేస్తున్న ఉక్రెయిన్ సైనికులు”.. సొంత దేశం మహిళలతోనే హనీ ట్రాప్ నెట్.. సంచలన ఆరోపణలు!

ఉక్రెయిన్‌పై రష్యా సాగిస్తున్న యుద్ధం పలు ఘట్టాలు దాటుకుంటూ సుదీర్ఘంగా కొనసాగుతున్న వేళ, ప్రస్తుతం ఉక్రెయిన్ సైనిక వీరులను టార్గెట్ చేస్తూ రష్యా ఒక ప్రమాదకరమైన ‘హనీ ట్రాప్’ (Honey Trap – అందాల వల) వ్యూహాన్ని అమలు చేస్తోందనే షాకింగ్ సమాచారం వెలుగులోకి వచ్చింది.

ఉక్రెయిన్ దేశానికి చెందిన యువతులనే పావులుగా వాడుకుంటూ, సోషల్ మీడియా ద్వారా అక్కడి ఆర్మీ సైనికులను ఆకర్షించి.. వారి లొకేషన్లు (ఉనికి) మరియు సైనిక రహస్యాలను రష్యా దొంగిలిస్తోందని ఉక్రెయిన్ పోలీస్ ఉన్నతాధికారి ఒకరు సంచలన ఆరోపణలు చేశారు. యుద్ధభూమిలో నేరుగా తలపడటమే కాకుండా, సైనికుల బలహీనతలను ఆసరాగా చేసుకుని కుట్రల ద్వారా వారిని దెబ్బతీయడానికి రష్యా ఈ సరికొత్త రకమైన నెట్వర్క్ తంత్రాన్ని ఉపయోగిస్తోందని ఆయన పేర్కొన్నారు.

ఈ కుట్రపూరిత వలలో ఉక్రెయిన్ సైనికులు సులభంగా చిక్కుకుపోతున్నారని, తమకు తెలియకుండానే కీలక సైనిక రహస్యాలను ఆ యువతులతో పంచుకుంటూ ముప్పును కొనితెచ్చుకుంటున్నారని ఉక్రెయిన్ పోలీసు శాఖ హెచ్చరించింది. ప్రేమ నటిస్తూ, స్నేహం నటిస్తూ పరిచయం పెంచుకునే ఈ యువతులంతా వాస్తవానికి రష్యా నిఘా సంస్థ (రష్యన్ ఇంటెలిజెన్స్) నియంత్రణలో పనిచేస్తున్నట్లు తెలుస్తోంది. ఈ నేపథ్యంలో, సోషల్ మీడియాను ఉపయోగించేటప్పుడు సైనిక సిబ్బంది అత్యంత అప్రమత్తంగా ఉండాలని, ముక్కూమొహం తెలియని యువతుల ఖాతాల నుండి వచ్చే మెసేజ్‌లకు స్పందించకూడదని ఉక్రెయిన్ రక్షణ దళాలు (Security Forces) కఠినమైన ఆదేశాలు జారీ చేశాయి.