Claude Fable 5: ప్రపంచ బ్యాంకింగ్ వ్యవస్థలనే ముంచేసే ఏఐ..? అమెరికా ప్రభుత్వం సంచలన నిర్ణయం, ఆంత్రోపిక్‌కు షాక్!

అమెరికాకు చెందిన ప్రముఖ ఆర్టిఫిషియల్ ఇంటెలిజెన్స్ (AI) సంస్థ ‘ఆంత్రోపిక్’ (Anthropic) డెవలప్ చేసిన అత్యంత శక్తివంతమైన సరికొత్త ఏఐ మోడల్స్ ‘క్లాడ్ ఫేబుల్ 5’ (Claude Fable 5), ‘మైథోస్ 5’ (Mythos 5) లపై అమెరికా ప్రభుత్వం హఠాత్తుగా నిషేధం విధించింది. ఈ మోడల్స్‌ను విదేశీయులు ఎవరూ ఉపయోగించకుండా అమెరికా వాణిజ్య శాఖ (US Department of Commerce) జారీ చేసిన ఉత్తర్వులను ఆంత్రోపిక్ సంస్థ వెల్లడించింది. దేశ జాతీయ భద్రతను దృష్టిలో ఉంచుకునే ఈ నిర్ణయం తీసుకున్నట్లు అమెరికా పేర్కొంది.

ఈ ప్రభుత్వ ఉత్తర్వుల కారణంగా, అమెరికాలో నివసిస్తున్నప్పటికీ అమెరికా పౌరసత్వం లేనివారు, అలాగే అమెరికా వెలుపల ఉన్న ప్రపంచవ్యాప్త యూజర్లు ఎవరూ కూడా ఈ కొత్త ఏఐ మోడల్స్‌ను యాక్సెస్ చేయలేరు. దీంతో ఆంత్రోపిక్ సంస్థ ప్రపంచవ్యాప్తంగా ఉన్న తన వినియోగదారుల కోసం Fable 5, Mythos 5 సేవలను తాత్కాలికంగా నిలిపివేయాల్సి వచ్చింది.

ఆంత్రోపిక్ సంస్థ ఇటీవలనే క్లాడ్ ఫేబుల్ 5 అనే కొత్త ఏఐ మోడల్‌ను మార్కెట్లోకి తెచ్చింది. ఇది “మైథోస్ క్లాస్” (Mythos Class) అని పిలిచే అత్యంత అధునాతన ఏఐ సామర్థ్యాలతో రూపొందింది.

బ్యాంకింగ్ వ్యవస్థలకు పొంచి ఉన్న ముప్పు!
అత్యంత క్లిష్టమైన కంప్యూటర్ నెట్‌వర్క్‌లను విశ్లేషించడం, ఏళ్ల తరబడి వాడుకలో ఉన్న సాంకేతిక నిర్మాణాలలో (Tech Architecture) ఉన్న లోపాలను కనిపెట్టడం వంటి అసాధారణ శక్తులు ఈ ఏఐ మోడల్‌కు ఉన్నాయని నిపుణులు చెబుతున్నారు.

ముఖ్యంగా బ్యాంకులు, ఆర్థిక సంస్థలు దశాబ్దాలుగా ఉపయోగిస్తున్న పాత, సంక్లిష్టమైన సాఫ్ట్‌వేర్ సిస్టమ్స్‌లోని భద్రతా లోపాలను (Security Flaws) ఈ ఏఐ చాలా వేగంగా గుర్తించగలదు. ఒకవేళ ఈ అత్యాధునిక ఏఐ మోడల్ గనుక తప్పుడు వ్యక్తుల (హ్యాకర్ల) చేతుల్లోకి వెళ్తే, ప్రపంచవ్యాప్తంగా భారీ ఎత్తున సైబర్ దాడులు జరిగే ప్రమాదం ఉందని నిపుణులు హెచ్చరిస్తున్నారు. దీనివల్ల వందల బిలియన్ డాలర్ల ప్రజాధనం, పెట్టుబడులు బూడిదవుతాయనే ఆందోళన వ్యక్తమవుతోంది.

అయితే, ఈ ఏఐ కేవలం అమెరికన్ల చేతుల్లోనే ఉంటే.. దుండగులైన కొందరు అమెరికన్లు ఇతర దేశాల ఆర్థిక వ్యవస్థలను దెబ్బతీయడానికి దీనిని ఉపయోగించరా అనే ప్రశ్నలు కూడా తలెత్తుతున్నాయి.

ఆంత్రోపిక్ సంస్థ వివరణ:
మరోవైపు, ఈ నిషేధానికి వెనుక ఉన్న అసలైన జాతీయ భద్రతా కారణాలపై అమెరికా ప్రభుత్వం పూర్తిస్థాయి స్పష్టత ఇవ్వలేదు. కేవలం అపార్థాల వల్లే ప్రభుత్వం ఈ నిర్ణయం తీసుకుందని ఆంత్రోపిక్ సంస్థ అభిప్రాయపడింది. ఈ సమస్యపై అమెరికా ప్రభుత్వంతో చర్చలు జరుపుతున్నామని, త్వరలోనే వివాదాన్ని పరిష్కరించి సేవలను పునరుద్ధరిస్తామని సంస్థ పేర్కొంది.

ప్రస్తుతానికైతే, ప్రపంచవ్యాప్తంగా ఉన్న విదేశీ యూజర్లు క్లాడ్ ఫేబుల్ 5, మైథోస్ 5 మోడల్స్‌ను ఉపయోగించే అవకాశం లేదు. అయితే, ఆంత్రోపిక్ సంస్థకు చెందిన మిగిలిన పాత క్లాడ్ ఏఐ (Claude AI) మోడల్స్ ఎప్పటిలాగే యథావిధిగా పనిచేస్తాయని కంపెనీ స్పష్టం చేసింది.