హైదరాబాద్ లో రూ. 7000 విలువైన కొత్త పరుపు.. ఒక్కరోజులోనే రూ. 0 గా ఎలా మారింది? చెత్తకుప్ప పాలైన ‘పరుపు’ వెనుక ఉన్న అసలు కథ..!

ఆ ఇంట్లో నివసించే 67 ఏళ్ల రిటైర్డ్ ప్రభుత్వ ఉద్యోగి చాలా రోజులుగా తన కొడుకుతో.. “ఒరేయ్.. ఈ పాత పరుపు (Mattress) మార్చరా, దీనివల్ల విపరీతంగా నడుము నొప్పి వస్తోంది” అని చెబుతూనే ఉన్నాడు.

చివరికి కొడుకు కూడా వారం క్రితం ఒక సరికొత్త బ్రాండెడ్ పరుపును కొని ఇచ్చాడు. ఆ రోజు రాత్రి ఆ కొత్త పరుపుపై పడుకున్న ఆ వృద్ధుడు.. “అద్భుతం! ఇకపై నాకు నడుము నొప్పే రాదు!” అని ఎంతో సంతోషంగా చెప్పాడు. కానీ, విచిత్రం ఏమిటంటే.. ఆ పరుపు విలువ ఒక్కరోజులోనే శూన్యంగా మారి చెత్తకుప్ప పాలైంది.

సామాజిక మాధ్యమం ‘ఎక్స్’ (X) వేదికగా ఒక నెటిజన్ పంచుకున్న ఈ గుండెకు హత్తుకునే యథార్థ కథనాన్ని అతని మాటల్లోనే ఇప్పుడు చూద్దాం..

“ఉదయం నేను ఇంట్లో ఉన్న చెత్తను తీసుకుని బయటకు వచ్చేసరికి మున్సిపాలిటీ బండి వెళ్లిపోయింది. సరే, ఎలాగూ గుడికి వెళ్తున్నాను కదా, దారిలో ఉన్న మున్సిపల్ చెత్తకుండిలో వేయవచ్చని ఆ కవర్‌ను తీసుకుని వెళ్లాను. నేను నా కవర్‌ను చెత్తకుండిలో వేస్తుండగా.. ఇద్దరు కుర్రాళ్లు మోయలేని బరువును మోస్తున్నట్లుగా ఒక పరుపును మోసుకుంటూ వచ్చి, చెత్తకుండి పక్కనే ఉన్న గోడకు ఆనించి పెట్టారు. అది చూడటానికి పూర్తి సరికొత్తగా, ఒక ప్రముఖ కంపెనీకి చెందిన పరుపులా ఉంది. దాని విలువ కనీసం రూ. 7000 అయినా ఉంటుంది. దానిపై ఉన్న ప్లాస్టిక్ కవర్ ముందు వైపు కాస్త చిరిగి ఉన్నా, వెనుక వైపు అసలు విప్పనైనా లేదు.

నాకు చాలా ఆశ్చర్యం వేసింది.. పరుపును అక్కడ పెట్టిన ఒక కుర్రాడిని పిలిచి ‘ఎందుకు ఇలా చేస్తున్నారు?’ అని అడిగాను. ఆ పరుపు అదే వీధిలోని ఒక ఇంటికి చెందింది. అయితే ఆ కుర్రాళ్లు ఆ ఇంటి వాళ్లు కాదు.. పక్కంటి పిల్లలు. ఆ ఇంట్లో ఉన్న 67 ఏళ్ల పెద్దాయన (Retired Govt. Officer) చాలా కాలంగా తన కొడుకుతో పాత పరుపు మార్చమని, నడుము నొప్పి వస్తోందని చెబుతూనే ఉన్నాడట. కొడుకు కూడా వారం క్రితమే ఆ కొత్త పరుపును కొని తెచ్చాడు. ఆ రాత్రి దానిపై పడుకుని చూసిన ఆ పెద్దాయన.. ‘ఇక నడుము నొప్పి రాదు’ అని ఆనందపడ్డాడు.

కట్ చేస్తే.. మరుసటి రోజు ఉదయం:

నిజంగానే మరుసటి రోజు ఉదయం ఆయనకు ఎలాంటి నడుము నొప్పి రాలేదు. ఎందుకంటే, ఆయన అసలు నిద్ర లేవనే లేదు. నిద్రలోనే ఆయన ప్రాణాలు విడిచారు (కన్నుమూశారు).

ఆ నిమిషం నుండే ఆ పరుపు మార్కెట్ విలువ రూ. 7,000 నుండి నేరుగా రూ. 0 కి పడిపోయింది. మొదట ఆ పరుపును ఇంట్లో పనిచేసే ఆమెకు ఇవ్వాలని చూశారట. కానీ ఆమె.. ‘వద్దు సార్.. అందులో ఆ పెద్దాయన ఆత్మ ఉంటుంది’ అంటూ వెనకడుగు వేసింది. పోనీ వేరే ఎవరికైనా ఇద్దామని ప్రయత్నించినా, ఆ పరుపు వెనుక ఉన్న కథ వినగానే అందరూ భయంతో పారిపోయారు. చివరికి ఆ పరుపు, ఎలాంటి తప్పు చేయకపోయినా.. అనాథగా వచ్చి చెత్తకుండి పక్కన నిలబడాల్సి వచ్చింది.

ఇక్కడ నాకు ఒక విషయం మాత్రం అస్సలు అర్థం కాలేదు.. వారం క్రితం వరకు ‘నడుము నొప్పే రానివ్వదు’ అని అందరి చేత పొగడబడిన పరుపు.. కేవలం ఒక్క వారంలోనే ‘దెయ్యం/ఆత్మ ఉన్న పరుపు’ అనే ముద్రను వేసుకుంది!

భయం, నమ్మకం, మూఢనమ్మకం..

దీనికి ఏ పేరు అయినా పెట్టుకోవచ్చు. కానీ, ఆ చెత్తకుప్ప పక్కన ఉన్న పరుపు మాత్రం మనసులో ఒకే ఒక్క ప్రశ్న అడుగుతున్నట్లు అనిపించింది: “నేను ఏం పాపం చేశానని నన్ను ఇక్కడికి తెచ్చి పెట్టారు.. ఎక్కడ ఉండాల్సిన నేను, ఇక్కడ ఎలా ఉన్నాను?” అంటూ ఆ నెటిజన్ ఆవేదన వ్యక్తం చేశారు.

ఈ పోస్ట్‌పై స్పందించిన మరో నెటిజన్.. ‘శవానికి కట్టే కొత్త దవతి, కొత్త పట్టుచీరల కథ కూడా ఇంతే’ అని కామెంట్ చేయగా.. ఇంకొక నెటిజన్ మాత్రం, ‘నిజంగానే ఆత్మలపై అంత భయం ఉంటే.. చనిపోయిన వారు వాడిన బంగారు గొలుసులు, బంగారు ఉంగరాలను మాత్రం ఎందుకు చెత్తలో పడేయరు? అక్కడ మూఢనమ్మకాలు పని చేయవా?’ అంటూ సమాజంలోని ద్వంద్వ నీతిని పొట్టన పొడిచినట్లు నిజం చెప్పారు.”