పారిస్: ఫ్రాన్స్లో జీ7 (G7) దేశాల వార్షిక శిఖరాగ్ర సదస్సు ఘనంగా ప్రారంభమైంది. ఈ సదస్సులో భారత ప్రధాని నరేంద్ర మోదీ, అమెరికా అధ్యక్షుడు డొనాల్డ్ ట్రంప్తో సహా జీ7 సభ్య దేశాల అధినేతలు పాల్గొన్నారు.
గడిచిన 16 నెలల తర్వాత ప్రధాని మోదీ – డొనాల్డ్ ట్రంప్ ఇద్దరూ ఇక్కడ కలుసుకున్నారు. ఆ సమయంలో ప్రధాని మోదీని చూడగానే డొనాల్డ్ ట్రంప్ ఇచ్చిన రియాక్షన్కు సంబంధించిన వీడియో ప్రస్తుతం సోషల్ మీడియాలో విపరీతంగా ట్రెండ్ అవుతోంది.
ప్రత్యేక ఆహ్వానితుడిగా ప్రధాని మోదీ
ప్రపంచ దేశాలు వేర్వేరు అంతర్జాతీయ కూటములలో సభ్యులుగా ఉన్నాయి. ఆ క్రమంలో జీ7 కూటమిలో ఫ్రాన్స్, అమెరికా, బ్రిటన్, జర్మనీ, జపాన్, ఇటలీ, కెనడాతో పాటు యూరోపియన్ యూనియన్ సభ్యులుగా ఉన్నాయి. ఈ కూటమిలో భారతదేశానికి సభ్యత్వం లేదు.
అయినప్పటికీ, ప్రతి సంవత్సరం జీ7 సదస్సుకు ఆతిథ్యం ఇచ్చే దేశం తమ మిత్రదేశాలను ప్రత్యేక ఆహ్వానితులుగా (Special Invitees) పిలవడం ఆనవాయితీ. ఆ విధంగా ఈసారి జీ7 సదస్సుకు ఫ్రాన్స్ నాయకత్వం వహిస్తోంది. ఫ్రాన్స్ అధ్యక్షుడు ఇమ్మాన్యుయేల్ మాక్రాన్, ప్రధాని మోదీల మధ్య మంచి సన్నిహిత సంబంధాలు ఉన్నాయి.
దీని కారణంగా ప్రధాని మోదీని జీ7 సదస్సులో పాల్గొనవలసిందిగా ఫ్రాన్స్ ఆహ్వానించింది. ఫ్రాన్స్లోని ‘ఎవియాన్-లెస్-బైన్స్’ (Évian-les-Bains) నగరంలో ఈ సదస్సు జరుగుతోంది.
ఆప్యాయంగా పలకరించుకున్న నేతలు
అమెరికా ఈ కూటమిలో సభ్యదేశం కావడంతో అధ్యక్షుడు డొనాల్డ్ ట్రంప్ కూడా ఈ సదస్సుకు హాజరయ్యారు. సదస్సు ప్రారంభంలో ప్రధాని నరేంద్ర మోదీ, డొనాల్డ్ ట్రంప్ ఎదురుపడ్డారు. అప్పుడు ఇద్దరు నేతలు ఎంతో ఆప్యాయంగా కరచాలనం (Handshake) చేసుకుని, ఒకరి భుజాలపై ఒకరు తట్టుకుంటూ మాట్లాడుకున్నారు.
సదస్సు హాల్లోకి దేశాల అధినేతలు ఒక్కొక్కరుగా వస్తున్నారు. డొనాల్డ్ ట్రంప్ అందరికంటే ముందే వచ్చి తన సీట్లో కూర్చున్నారు. ఆ తర్వాత ప్రధాని మోదీ అక్కడికి వచ్చారు. ట్రంప్ పక్కనే ప్రధాని మోదీకి సీటు కేటాయించారు. మోదీ తన సీటు వైపు వస్తుండటం గమనించిన ట్రంప్, వెంటనే సీట్లో నుంచి లేచి నిలబడి ఆయనకు షేక్హ్యాండ్ ఇచ్చారు. ఆ తర్వాత కొద్ది సెకన్ల పాటు ఇద్దరూ నవ్వుతూ మాట్లాడుకుంటూ భుజాలు తట్టుకున్నారు. ఇది వారిద్దరి మధ్య ఎన్నో ఏళ్లుగా ఉన్న మంచి స్నేహాన్ని ప్రతిబింబించేలా ఉంది.
ఆ తర్వాత ప్రధాని మోదీ పక్కన కూర్చున్న డొనాల్డ్ ట్రంప్.. తన రెండు చేతుల బొటనవేళ్లను పైకెత్తి ‘డబుల్ థంబ్స్-అప్’ (Double Thumbs-up) సైగ చేశారు. ఇది సదస్సుకు వచ్చిన ఇతర దేశాల అధినేతల దృష్టిని ఆకర్షించింది. భారతీయ ఉత్పత్తులపై అమెరికా విధించిన టారిఫ్ల (పన్నులు) విషయంలో గత కొన్ని నెలలుగా ఇరుదేశాల మధ్య విభేదాలు నడుస్తున్న నేపథ్యంలో ఈ ఇద్దరు నేతలు కలుసుకోవడం విశేషం. ప్రధాని మోదీ వైట్ కుర్తా-పైజామా, బ్లూ కలర్ స్లీవ్లెస్ జాకెట్ ధరించగా, ట్రంప్ బ్లూ కలర్ సూట్, రెడ్ కలర్ టై ధరించారు.
16 నెలల తర్వాత భేటీ
డొనాల్డ్ ట్రంప్ అమెరికా అధ్యక్షుడిగా బాధ్యతలు చేపట్టిన కొన్ని రోజులకే ప్రధాని మోదీ వైట్హౌస్లో ఆయనను కలిశారు. ఆ తర్వాత వీరిద్దరూ మళ్లీ వ్యక్తిగతంగా కలుసుకోలేదు. దాదాపు 16 నెలల విరామం తర్వాత మోదీ – ట్రంప్ ఈరోజు ఇక్కడ ముఖాముఖి మాట్లాడుకున్నారు.
ఇదిలా ఉండగా, గతంలో పాకిస్తాన్కు వ్యతిరేకంగా చేపట్టిన ‘ఆపరేషన్ సింధూర్’ చర్యలను నిలిపివేయడం, భారత ఉత్పత్తులపై ట్రంప్ పన్నులు విధించడం వంటి పరిణామాల వల్ల భారత్-అమెరికా సంబంధాలలో కొంత స్తబ్దత ఏర్పడింది. ఆ తర్వాత ట్రంప్ పన్నులను తగ్గించారు. ప్రస్తుతం ఇరు దేశాల మధ్య వాణిజ్య ఒప్పంద చర్చలు తుది దశకు చేరుకున్న తరుణంలో ఈ ఇద్దరు నేతల భేటీ అత్యంత ప్రాధాన్యత సంతరించుకుంది.
Leave a Reply