చెన్నై: నేటి ఆధునిక కాలంలో కుటుంబాలు ఛిన్నాభిన్నం కావడానికి, విడాకుల కేసులు భారీగా పెరిగిపోవడానికి సెల్ఫోన్ వాడకమే ప్రధాన కారణమని చెన్నై హైకోర్టు న్యాయమూర్తి తీవ్ర ఆందోళన వ్యక్తం చేశారు.
కోర్టులో ఒక కేసు విచారణ సందర్భంగా న్యాయమూర్తి ఈ కీలక వ్యాఖ్యలు చేశారు. సైన్స్ అండ్ టెక్నాలజీ (శాస్త్ర సాంకేతిక రంగం) అభివృద్ధి వల్ల వచ్చిన సెల్ఫోన్లు.. ప్రస్తుత రోజుల్లో మనుషుల మధ్య ప్రత్యక్ష సంబంధాలను, భార్యాభర్తల మధ్య ఉండాల్సిన సామరస్యపూర్వక కుటుంబ బంధాలను పూర్తిగా దెబ్బతీస్తున్నాయని న్యాయమూర్తి స్పష్టం చేశారు.
డిజిటల్ ప్రపంచంలో బంధాలు మాయం
మనుషుల మధ్య ఉండాల్సిన సహజమైన ప్రేమ, పరస్పర నమ్మకాన్ని సెల్ఫోన్లు మెల్లమెల్లగా చంపేస్తున్నాయని న్యాయమూర్తి హెచ్చరించారు. ఒకే ఇంటి పైకప్పు కింద నివసిస్తున్నప్పటికీ, దంపతులు ఇద్దరూ ఒకరితో ఒకరు మాట్లాడుకుని అర్థం చేసుకోవడం మానేసి.. ఎప్పుడూ విడివిడిగా తమ తమ డిజిటల్ ప్రపంచంలోనే మునిగిపోతుండటమే కోర్టులలో విడాకుల కేసులు కుప్పలుతెప్పలుగా పేరుకుపోవడానికి కారణమని ఆయన అన్నారు.
అందువల్ల, కుప్పకూలుతున్న కుటుంబ వ్యవస్థను కాపాడుకోవడానికి, కోర్టుల మెట్లు ఎక్కకుండా ఉండటానికి దంపతులు ఇద్దరూ సెల్ఫోన్ వాడకాన్ని తగ్గించుకోవాలని సూచించారు. పరస్పరం ఒకరికొకరు తగినంత సమయాన్ని (Quality time) కేటాయించుకోవాలని న్యాయమూర్తి ఈ సందర్భంగా హితవు పలికారు.
Leave a Reply