ముస్సోరీ: ఉత్తరాఖండ్ రాష్ట్రంలోని ముస్సోరీలో గల ఒక హోమ్స్టేలో, దిల్లీకి చెందిన 27 ఏళ్ల ఐటీ (IT) మహిళా ఉద్యోగిని పి. రాధా గాయత్రి మర్మస్థితిలో మృతి చెందిన ఘటన స్థానికంగా తీవ్ర కలకలం రేపింది.
గురుగ్రామ్లో ఉద్యోగం చేస్తున్న గాయత్రికి, పుణెలో పనిచేస్తున్న సౌమ్య శ్రీచరణ్ అనే యువకుడితో గత నవంబర్ నెలలో వివాహం జరిగింది. భర్త పుట్టినరోజు వేడుకలను జరుపుకోవడం కోసం ముస్సోరీకి టూరిస్టులుగా వచ్చిన ఈ జంట, జూన్ 15 రాత్రి అక్కడ ఉన్న ఒక హోమ్స్టేలో బస చేశారు.
ముక్కు, నోటి నుంచి రక్తస్రావం..
అక్కడ పుట్టినరోజు వేడుకల సందర్భంగా రాత్రంతా ఇద్దరూ మద్యం సేవించినట్లు తెలుస్తోంది. మరుసటి రోజు ఉదయం భర్త సౌమ్య శ్రీచరణ్ లేచి చూసేసరికి, రాధా గాయత్రి స్పృహ లేకుండా ముక్కు, నోటి నుండి రక్తం కారుతున్న స్థితిలో పడి ఉంది. వెంటనే ఆమెను స్థానిక ఆసుపత్రికి తరలించగా, ఆమె అప్పటికే మరణించినట్లు వైద్యులు ధృవీకరించారు. సమాచారం అందుకున్న పోలీసులు, ఫోరెన్సిక్ బృందంతో కలిసి ఘటన జరిగిన గదిని క్షుణ్ణంగా తనిఖీ చేశారు. ఆ సమయంలో గదిలో రక్తపు మరకలు, ఖాళీ మద్యం సీసాలతో పాటు భర్త ఉపయోగించినట్లు భావిస్తున్న లైంగిక ఉద్దీపన మాత్రల (సెక్స్ స్టిమ్యులెంట్స్) ఖాళీ కవర్లను పోలీసులు స్వాధీనం చేసుకున్నారు.
వివిధ కోణాల్లో పోలీస్ దర్యాప్తు..
ఈ అనుమానాస్పద మృతిపై పోలీసులు కేసు నమోదు చేసి తీవ్రంగా విచారిస్తున్నారు. మహిళ శరీరపై ఎలాంటి బాహ్య గాయాలు లేకపోవడంతో, ఆమె పోస్టుమార్టం ప్రక్రియను పూర్తిగా వీడియో రికార్డింగ్ చేస్తూ నిర్వహించారు. అలాగే మరణానికి గల ఖచ్చితమైన కారణాలను తెలుసుకోవడానికి ఆమె శరీరంలోని ముఖ్య అవయవాల నమూనాలను (విసెరా) ల్యాబొరేటరీ పరీక్షల కోసం పంపించారు.
మరోవైపు తన కుమార్తె మరణంపై తీవ్ర అనుమానాలు ఉన్నాయని, దీనిపై నిష్పాక్షిక విచారణ జరిపించాలని బాధితురాలి తండ్రి పోలీసులను కోరారు. మితిమీరిన మద్యం ప్రభావమా, తీసుకున్న టాబ్లెట్ల సైడ్ ఎఫెక్ట్సా లేక దీని వెనుక ఏదైనా కుట్ర ఉందా అనే పలు కోణాల్లో ముస్సోరీ పోలీసులు దర్యాప్తును ముమ్మరం చేశారు.
Leave a Reply