పూణే: పూణే నగరానికి చెందిన ప్రముఖ పారిశ్రామికవేత్త విశాల్ అగర్వాల్ కుమారుడు కేతన్ అగర్వాల్కు, మరో వ్యాపారవేత్త కుమార్తె సియా గోయల్తో రాబోయే రోజుల్లో వివాహం జరగాల్సి ఉంది.
దీనికోసం రాజస్థాన్ రాష్ట్రం ఉదయ్పూర్లోని ఒక అత్యంత విలాసవంతమైన, భారీ ప్యాలెస్ను బుక్ చేశారు. బంధువులను తీసుకెళ్లడానికి రెండు చార్టర్డ్ విమానాలతో (తని విమానం) కలిపి దాదాపు రూ. 14 కోట్ల భారీ బడ్జెట్తో పెళ్లి ఏర్పాట్లు అత్యంత వైభవంగా జరుగుతున్నాయి. ఈ క్రమంలో, తన కాబోయే భార్య సియా గోయల్ పుట్టినరోజు (బర్త్డే) వేడుకలను జరుపుకోవడానికి కేతన్ అగర్వాల్ ఆమెతో కలిసి లోహ్గఢ్ కోటకు ట్రెక్కింగ్ వెళ్లాడు.
అక్కడ ఊహించని విధంగా కేతన్ లోయలో పడి మరణించినట్లు మొదట వార్తలు వచ్చాయి. కానీ, పోలీసుల ముమ్మర విచారణలో అది ప్రమాదం కాదని.. సియా గోయల్ తన ప్రియుడు చేతన్ చౌదరి మరియు స్నేహితుల సహాయంతో కేతన్ను పక్కా ప్లాన్తో లోయలోకి నెట్టి దారుణంగా హత్య చేసినట్లు బయటపడింది. ఈ కిరాతక కుట్రకు సంబంధించి సియా గోయల్, చేతన్ చౌదరి సహా మొత్తం 8 మందిపై పోలీసులు ప్రస్తుతం కేసు నమోదు చేశారు.
ఎస్పీ విచారణలో షాకింగ్ నిజాలు – అంతకుముందే కుట్ర:
ఈ ఘోర హత్య కేసు వెనుక ఉన్న సంచలన వివరాలను జిల్లా ఎస్పీ (SP) సందీప్ సింగ్ గిల్ నేతృత్వంలోని పోలీస్ బృందం వెలికితీసింది. సియాకు ఈ పెళ్లి చేసుకోవడం అస్సలు ఇష్టం లేదు, ఆమె చేతన్ చౌదరితో చాలా కాలంగా ప్రేమలో ఉంది. అంతకుముందు, వీరిద్దరూ మరో జంటతో కలిసి ఇండోనేషియాలోని బాలి దీవులకు టూర్కు వెళ్లాలని ప్లాన్ చేశారు. అయితే, ఆ సమయంలో కేతన్ పాస్పోర్ట్ మాత్రమే రహస్యంగా మాయం కావడంతో అతను వెళ్లలేకపోయాడు.
దీనిని కొనసాగిస్తూ.. బర్త్డే సెలబ్రేషన్స్ అనే నెపంతో కేతన్ను లోహ్గఢ్ కోటకు రప్పించి, చేతన్ చౌదరి మరియు సియా గోయల్లు కలిసి అతడిపై ఒక వస్తువుతో దాడి చేసి, ఆపై లోయలోకి తోసేశారు.
నన్ను మోసం చేశారు – తండ్రి కన్నీటి రోదన:
ఈ ఘటనపై కేతన్ తండ్రి విశాల్ అగర్వాల్ మాట్లాడుతూ.. “మాకు ఈ పెళ్లి ఇష్టం లేదని నేరుగా చెప్పి ఉంటే.. మేమే వివాహాన్ని ఆపేసేవాళ్లం. కానీ, కేవలం 26 ఏళ్ల వయసున్న నా కొడుకును ఇంత కిరాతకంగా చంపేశారు. సియా ప్రేమ వ్యవహారం తెలిసి కూడా మమ్మల్ని నమ్మించి మోసం చేసిన ఆమె కుటుంబ సభ్యులను కూడా ఈ కేసులో నిందితులుగా చేర్చి వెంటనే అరెస్ట్ చేయాలి” అని కన్నీరుమున్నీరవుతూ డిమాండ్ చేశారు.
ప్రస్తుతం ప్రధాన నిందితులైన సియా గోయల్ మరియు చేతన్ చౌదరిలను పోలీసులు అరెస్ట్ చేసి న్యాయస్థానంలో ప్రవేశపెట్టారు.