ఇండోర్: మొబైల్ యాప్ను ఉపయోగించి నడుస్తున్న ఎలక్ట్రిక్ ఆటోలను (ఇ-రిక్షాలను) మధ్యలోనే ఆపివేసి, డ్రైవర్లను భయపెట్టి డబ్బులు వసూలు చేస్తున్న విచిత్రమైన మోసం వెలుగులోకి వచ్చింది. సాంకేతిక నిపుణుడిలా నటించి, ఆటోలను రిపేర్ చేస్తానంటూ డ్రైవర్ల నుండి డబ్బులు వసూలు చేస్తున్న 18 ఏళ్ల యువకుడిని పోలీసులు అరెస్టు చేశారు. ఈ ఘటన స్థానికంగా కలకలం రేపడమే కాకుండా, ఎలక్ట్రిక్ వాహనాల భద్రతపై అనేక ప్రశ్నలను లేవనెత్తింది.
మోసం ఎలా సాగుతోంది? మధ్యప్రదేశ్లో జరిగిన ఈ ఘటనలో, ఒక యువకుడు తన మొబైల్ యాప్ ద్వారా దూరంగా ఉన్న ఆటోలను రిమోట్ కంట్రోల్ ద్వారా ఆపివేస్తున్నాడు. అర్ధరాత్రి వేళల్లో, జనసంచారం తక్కువగా ఉన్న ప్రాంతాల్లో వెళ్తున్న ఇ-రిక్షాలనే వీరు లక్ష్యంగా చేసుకున్నారు. మొబైల్ యాప్ సహాయంతో ఆ వాహనాలను దూరం నుండే నిలిపివేశారు. ఆటోలు మధ్యలోనే ఆగిపోవడంతో ఆందోళనకు గురైన డ్రైవర్లను ఆ యువకుడు సమీపించి, తాను ఒక టెక్నికల్ ఎక్స్పర్ట్ అని నమ్మించి, వాహనాన్ని మళ్లీ స్టార్ట్ చేయడానికి 200 నుండి 300 రూపాయలు (కొన్నిసార్లు అంతకంటే ఎక్కువ) వసూలు చేసేవాడు.
బాధిత డ్రైవర్ల ఫిర్యాదు మేరకు పోలీసులు విచారణ చేపట్టగా, రితేష్ బానూపా అనే 18 ఏళ్ల యువకుడు ఈ మోసానికి పాల్పడుతున్నట్లు గుర్తించి అరెస్టు చేశారు. దీనికి సంబంధించిన సీసీటీవీ దృశ్యాలు మరియు ఇతర ఆధారాలను పోలీసులు పరిశీలిస్తున్నారు. అలాగే, ఇంటర్నెట్లో ఇలాంటి ప్రాంక్ వీడియోలు (Prank Videos) కూడా వైరల్ అవుతున్నాయని, వాటిపై కూడా విచారణ జరుపుతున్నామని పోలీసులు తెలిపారు.
ఎలా సాధ్యమవుతోంది? ఎలక్ట్రిక్ వాహనాల బ్యాటరీలను నిర్వహించడానికి ‘బ్యాట్ బిఎమ్ఎస్’ (BatBMS) అనే యాప్ను ఉపయోగిస్తారు. ఇది బ్యాటరీ యొక్క ఆయుష్షు, ఛార్జింగ్ స్థాయి, ఉష్ణోగ్రత, వోల్టేజ్ మరియు విద్యుత్ ఉత్పత్తిని పర్యవేక్షిస్తుంది. బ్లూటూత్ లేదా ఇంటర్నెట్ ద్వారా ఈ సమాచారాన్ని మొబైల్లో చూసేందుకు ఈ యాప్ను రూపొందించారు. భారతదేశంలో అమ్ముడవుతున్న చాలా ఇ-రిక్షాల్లో ఈ టెక్నాలజీనే వాడుతున్నారు.
ఈ యాప్ ద్వారా బ్లూటూత్ పరిధిలో ఉన్న ఏ బ్యాటరీకైనా పాస్వర్డ్ లేకుండా సులభంగా కనెక్ట్ అవ్వొచ్చని, ఈ సాంకేతిక లోపాన్ని ఉపయోగించుకునే ఆ యువకుడు హ్యాకింగ్కు పాల్పడ్డాడని తేలింది. ఈ సమస్య వెలుగులోకి వచ్చిన వెంటనే, ఆ లోపాన్ని సరిచేయడానికి అధికారులు చర్యలు తీసుకున్నారు.
ప్రజల భయం.. కార్లకు ప్రమాదమా? సాధారణంగా ఆటోలు రద్దీగా ఉండే మార్కెట్లు, పాఠశాలలు మరియు ఇరుకైన రహదారులపై తిరుగుతుంటాయి. అటువంటి చోట్ల వాహనం అకస్మాత్తుగా నిలిచిపోతే భారీ ట్రాఫిక్ జామ్ లేదా ప్రమాదాలు జరిగే అవకాశం ఉంది. దీనిపై ప్రజలు తీవ్ర ఆందోళన చెందుతున్నారు.
అయితే, విద్యుత్ కార్ల విషయానికి వస్తే, వాటిని ఇలా సులభంగా హ్యాక్ చేయడం కుదరదని నిపుణులు చెబుతున్నారు. పెద్ద కంపెనీలు తయారు చేసే విద్యుత్ కార్లలో అత్యున్నత భద్రతా ప్రమాణాలు మరియు అధునాతన సాంకేతికత ఉండటం వల్ల, వాటిని హ్యాక్ చేయడం అంత సులభం కాదని వారు స్పష్టం చేస్తున్నారు.