బెంగళూరుకు చెందిన ఉపాసన డోగ్రా, ఇన్స్టాగ్రామ్లో పంచుకున్న ఒక కొత్త ఆలోచన ఇప్పుడు నెట్టింట పెద్ద చర్చకు దారితీస్తోంది.
మధ్యతరగతి కుటుంబాలకు చెందిన వారు సాధారణంగా తమ రోజువారీ ఖర్చులను, అవసరాల కోసం పెట్టే డబ్బును ‘నష్టంగా’ లేదా ‘వృధా ఖర్చు’గా భావిస్తుంటారు. అలా కాకుండా, ఆ ఖర్చులను ‘మనల్ని మనం జాగ్రత్తగా చూసుకోవడానికి చేసే పెట్టుబడి’గా చూడాలని ఆమె సూచించారు. ఈ చిన్న మార్పు, సోషల్ మీడియా వినియోగదారులలో పెద్ద చర్చను రేకెత్తించింది.
మధ్యతరగతి నేపథ్యంలో పెరిగిన చాలామందికి డబ్బుతో సంబంధం ఎప్పుడూ సంక్లిష్టంగానే ఉంటుంది. “డబ్బును పొదుపు చేయి, ఎక్కువ ఖర్చు చేయకు” అనే సూచనలతో పెరగడం వల్ల, మన జీవన ప్రమాణాలను మెరుగుపరిచే ఖర్చులను కూడా భారంలాగే చూడటం అలవాటైపోయింది. అయితే, మనం కష్టపడి సంపాదించే డబ్బును ‘ఖర్చయిపోతోంది’ అని కాకుండా, ‘మనల్ని మనం బాగుగా చూసుకోవడానికి ఉపయోగపడుతోంది’ అని ఆలోచిస్తే ఎలా ఉంటుందనే కొత్త కోణాన్ని ఉపాసన ఆవిష్కరించారు.
తన సొంత ఉదాహరణతో వివరిస్తూ, నెలకు ₹20,000 అద్దె చెల్లించడం పెద్ద మొత్తంగా అనిపించినా, దాన్ని రోజువారీగా చూస్తే కేవలం ₹650 మాత్రమేనని ఆమె చెప్పారు. అలసిపోయిన రోజు చివరలో మనం ప్రశాంతంగా విశ్రాంతి తీసుకునే సురక్షితమైన ఇంటికి ఈ ₹650 చాలా తక్కువ ఖరీదే కదా! అదేవిధంగా, నెలకు ₹6,000 కిరాణా సరుకుల కోసం ఖర్చు చేయడం అంటే, రోజుకు ₹200 చొప్పున మన శరీరానికి అవసరమైన పోషకాహారాన్ని అందించే పెట్టుబడిగా మారుతుంది.
“ఆర్థిక స్పృహ అంటే ‘నా డబ్బు ఎక్కడికి వెళ్తోంది?’ అని అడగడం మాత్రమే కాదు, ‘నా డబ్బు నా కోసం ఏం చేస్తోంది?’ అని ప్రశ్నించుకోవడం కూడా” అన్న ఉపాసన మాటలు ఎంతోమంది మనసును తాకాయి. మధ్యతరగతి వారిలో ఖర్చు చేయడం వల్ల కలిగే అపరాధ భావాన్ని (Guilt) పోగొట్టేలా ఉన్న ఈ వీడియోకు నెట్టింట ప్రశంసలు వెల్లువెత్తుతున్నాయి. అద్దెను, రోజువారీ ఖర్చులను భారంగా భావిస్తున్న వారికి ఈ కొత్త ఆలోచన ఒక ప్రశాంతతను, స్పష్టతను ఇచ్చిందనడంలో సందేహం లేదు.