వర్షాకాలం వచ్చిందంటే చాలు, భారతదేశంలోని అనేక నగరాలు జలమయం కావడం సర్వసాధారణమైపోయింది. తాజాగా, మహారాష్ట్రలోని భీవండిలో కురుస్తున్న భారీ వర్షాల వల్ల రోడ్లన్నీ వరద నీటితో నిండిపోయాయి.
దీంతో వాహనదారులు తీవ్ర ఇబ్బందులకు గురయ్యారు, ట్రాఫిక్ పూర్తిగా స్తంభించిపోయింది. సాధారణంగా ఇలాంటి సమయాల్లో ప్రజలు ప్రభుత్వంపై ఆగ్రహం వ్యక్తం చేస్తూ ఇళ్లకే పరిమితమవుతారు, కానీ భీవండికి చెందిన షదాబ్ (Shadab) అనే యువకుడు మాత్రం భిన్నంగా స్పందించి దేశం మొత్తాన్ని తనవైపు తిప్పుకున్నాడు.
వరద నీటిని తొలగించడానికి మున్సిపాలిటీ అధికారులు ఎవరూ రాకపోవడంతో, షదాబ్ స్వయంగా రంగంలోకి దిగాలని నిర్ణయించుకున్నాడు. మార్వెల్ సినిమాల్లోని ‘స్పైడర్ మ్యాన్’ వేషధారణను ధరించి, మోకాళ్ల లోతు వరద నీటిలో దిగాడు.
ట్రాఫిక్ జామ్లో చిక్కుకున్న వాహనాలను క్రమబద్ధీకరించడమే కాకుండా, డ్రైనేజీ అడ్డంకులను తొలగించి నిలిచిన వర్షపు నీరు వెళ్లేలా చేశాడు. సినిమాల్లో స్పైడర్ మ్యాన్ ప్రజలను కాపాడటం చూసి ప్రేరణ పొందిన తాను, నిజ జీవితంలో కూడా ప్రజలకు సాయం చేయాలనే ఉద్దేశంతోనే ఈ వేషధారణలో వచ్చానని అతను భావోద్వేగంతో తెలిపాడు.ఈ ‘రియల్ లైఫ్ స్పైడర్ మ్యాన్’ చేసిన పనిని మీడియా సంస్థలు వీడియోగా విడుదల చేయగా, ప్రస్తుతం అది ఇంటర్నెట్లో విపరీతంగా వైరల్ అవుతోంది.
మరోవైపు, మహారాష్ట్రలో కురుస్తున్న భారీ వర్షాలు, కొండచరియలు విరిగిపడే ప్రమాదం ఉన్నందున రాష్ట్రవ్యాప్తంగా ‘రెడ్ అలర్ట్’ ప్రకటించినట్లు ముఖ్యమంత్రి దేవేంద్ర ఫడ్నవీస్ తెలిపారు. విపత్తు నిర్వహణ విభాగంతో అత్యవసర సమావేశం నిర్వహించిన ఆయన, జిల్లా యంత్రాంగం అంతా అప్రమత్తంగా ఉండాలని ఆదేశించారు. ముంబైలో మెట్రో, బస్సు సేవలు యథావిధిగా కొనసాగుతున్నాయని, కొన్ని చోట్ల మాత్రమే రైలు రవాణాకు అంతరాయం కలిగిందని ఆయన పేర్కొన్నారు.