తృణమూల్ కాంగ్రెస్ (TMC)కి చెందిన ముగ్గురు మాజీ రాజ్యసభ సభ్యులు భారతీయ జనతా పార్టీ (BJP)లో చేరారు. బీజేపీలో చేరిన వారిలో సుష్మితా దేవ్, ప్రకాష్ చిక్ బడాయిక్ మరియు సుఖేందు శేఖర్ రాయ్ ఉన్నారు.
ఈ ముగ్గురు నేతలు బీజేపీలో చేరడానికి ముందు తమ రాజ్యసభ సభ్యత్వాలకు రాజీనామా చేశారు. అనంతరం పశ్చిమ బెంగాల్ బీజేపీ అధ్యక్షుడు శమీక్ భట్టాచార్య అధికారికంగా వారిని పార్టీలోకి ఆహ్వానించారు. ప్రధాని నరేంద్ర మోదీ నాయకత్వం, బీజేపీ విధానాలపై నమ్మకంతోనే ఇంతటి సీనియర్ నేతలు పార్టీలో చేరడం తమకు ఎంతో సంతోషకరమని శమీక్ భట్టాచార్య పేర్కొన్నారు. పశ్చిమ బెంగాల్లో బీజేపీ బలం పెరుగుతోందనడానికి ఇది నిదర్శనమని ఆయన అన్నారు.
ఎవరీ నేతలు?
- సుష్మితా దేవ్ (Sushmita Dev)
సుష్మితా దేవ్ దేశంలోని ప్రముఖ మహిళా నాయకురాళ్లలో ఒకరు. సెప్టెంబర్ 25, 1972న జన్మించిన ఆమె, తన రాజకీయ ప్రస్థానాన్ని కాంగ్రెస్తో ప్రారంభించారు. 2014లో అస్సాంలోని సిల్చార్ నియోజకవర్గం నుండి ఎంపీగా ఎన్నికయ్యారు. ఆల్ ఇండియా మహిళా కాంగ్రెస్ జాతీయ అధ్యక్షురాలిగా కూడా పనిచేశారు. 2019లో ఓటమి తర్వాత కాంగ్రెస్ను వీడి, 2021లో టీఎంసీలో చేరారు. ఇప్పుడు జూన్ 2026లో టీఎంసీకి రాజీనామా చేసి బీజేపీ గూటికి చేరారు. మోదీ నాయకత్వంలోని డబుల్ ఇంజన్ ప్రభుత్వాల అభివృద్ధిని ఎవరూ కాదనలేరని, బెంగాల్లో కూడా మార్పు రావాలని ఆమె ఆకాంక్షించారు. - ప్రకాష్ చిక్ బడాయిక్ (Prakash Chik Baraik)
ప్రకాష్ చిక్ బడాయిక్ తృణమూల్ కాంగ్రెస్లో కీలక నేత. పశ్చిమ బెంగాల్ నుండి రాజ్యసభకు ఏకగ్రీవంగా ఎన్నికయ్యారు. సిలిగురిలోని సూర్యసేన్ కాలేజీలో బీకాం చదివిన ఆయన, ఎగువ సభలో పార్టీ తరపున గళం వినిపించారు. ఇప్పుడు రాజ్యసభకు రాజీనామా చేసి బీజేపీలో చేరడం టీఎంసీకి పెద్ద ఎదురుదెబ్బగా భావిస్తున్నారు. - సుఖేందు శేఖర్ రాయ్ (Sukhendu Sekhar Roy)
1949లో జన్మించిన సుఖేందు శేఖర్ రాయ్ బెంగాల్ రాజకీయాల్లో అత్యంత అనుభవజ్ఞులైన నేత. 2011 నుండి టీఎంసీ టికెట్పై వరుసగా రాజ్యసభకు వెళ్తున్నారు. పార్టీలో ఆయన మాటలకు ఎంతో విలువ ఉండేది. అయితే జూన్ 2026లో రాజ్యసభకు రాజీనామా చేసి బీజేపీలో చేరారు. ఆర్జీ కర్ మెడికల్ కాలేజీ ఘటన తర్వాత, పోలీసు కమిషనర్, ప్రిన్సిపాల్లను అరెస్టు చేయాలని బహిరంగంగా డిమాండ్ చేసిన ఏకైక ఎంపీ ఆయనే. దీనివల్ల ఆయనపై కోల్కతా పోలీసులు కక్ష సాధింపు చర్యలకు పాల్పడ్డారని, తనకు, తన కుటుంబానికి ప్రాణహాని ఉందని, అందుకే బీజేపీలో చేరాల్సి వచ్చిందని ఆయన ఆరోపించారు.
బెంగాల్ రాజకీయాలపై ప్రభావం
ఈ ముగ్గురు కీలక నేతలు ఒకేసారి బీజేపీలో చేరడం, టీఎంసీలో అంతర్గత విభేదాలు తారాస్థాయికి చేరాయని స్పష్టం చేస్తోంది. పార్లమెంటు వర్షాకాల సమావేశాలకు ముందే ఎంపీల రాజీనామాలు, బీజేపీలో చేరికలు… బెంగాల్లో మమతా సర్కార్ను ఇరుకున పెట్టేందుకు బీజేపీ వ్యూహాత్మకంగా అడుగులు వేస్తోందని సూచిస్తున్నాయి.