జీంద్: హర్యానాలోని సఫీదో కోర్టు ప్రాంగణం బయట శనివారం ఉదయం తీవ్ర ఉద్రిక్తత చోటుచేసుకుంది. తనకంటే పదేళ్లు చిన్నవాడైన మేనల్లుడితో కలిసి ‘లివ్-ఇన్ రిలేషన్షిప్’ ఒప్పందం చేసుకోవడానికి వచ్చిన ఒక మహిళను చూసి, ఆమె భర్త మరియు గ్రామస్తులు ఆగ్రహంతో ఊగిపోయారు.
ఏం జరిగింది?
పానిపట్కు చెందిన 28 ఏళ్ల వివాహిత, తన భర్త అన్న కొడుకు (మేనల్లుడు)తో ప్రేమలో పడింది. సదరు యువకుడు ఆమె కంటే వయస్సులో పదేళ్లు చిన్నవాడు. సమాజం, బంధువుల గురించి ఏమాత్రం ఆలోచించకుండా, భర్తను వదిలేసి అతడితోనే కలిసి ఉండాలని ఆ మహిళ నిర్ణయించుకుంది. శనివారం ఉదయం ఇద్దరూ కలిసి లివ్-ఇన్ రిలేషన్షిప్ కోసం అవసరమైన చట్టపరమైన పత్రాలు, స్టాంప్ పేపర్లు సిద్ధం చేసుకునేందుకు సఫీదో కోర్టుకు వచ్చారు.
కోర్టు బయట హై-వోల్టేజ్ డ్రామా:
ఈ విషయం తెలిసిన మహిళ భర్త మరియు కొంతమంది గ్రామస్తులు వెంటనే కోర్టు వద్దకు చేరుకున్నారు. భార్యను, మేనల్లుడిని కోర్టు బయట చూడగానే భర్త కోపంతో ఊగిపోయి, మేనల్లుడిని పట్టుకుని నడిరోడ్డుపైనే చితకబాదాడు. ఇరువర్గాల మధ్య తోపులాటలు, వాగ్వాదాలు జరిగి కోర్టు ప్రాంగణం రణరంగంగా మారింది.
పోలీసుల జోక్యం:
పరిస్థితి అదుపు తప్పుతుండటంతో స్థానిక దుకాణదారులు పోలీసులకు సమాచారం అందించారు. వెంటనే రంగంలోకి దిగిన పోలీసులు ఇరువర్గాలను శాంతింపజేశారు. అయితే, ఆ మహిళ మాత్రం తన భర్త దగ్గరకు వెళ్లేందుకు నిరాకరిస్తూ, మేనల్లుడితోనే ఉంటానని పట్టుబడుతోంది.
బంధుత్వాల్లో జరిగిన ఈ వింత వివాదం ప్రస్తుతం ఆ ప్రాంతంలో తీవ్ర చర్చనీయాంశమైంది. పోలీసులు కేసు నమోదు చేసుకుని తదుపరి విచారణ చేపట్టారు.