జార్ఖండ్లోని గుమ్లా జిల్లాలో ఒక గ్రామ పంచాయితీ దారుణానికి ఒడిగట్టింది. మూడేళ్ల చిన్నారిపై జరిగిన అత్యాచారాన్ని కప్పిపుచ్చేందుకు ప్రయత్నిస్తూ, నిందితుడికి లక్ష రూపాయల జరిమానా విధించి, ఆ డబ్బులో కొంత భాగాన్ని పార్టీ కోసం ఖర్చు చేసింది. చివరకు పోలీసులు రంగప్రవేశం చేసి నిందితుడిని అరెస్టు చేశారు.
నిందితుడు సునీల్ లోహారా శనివారం సాయంత్రం బాధితురాలి ఇంటికి వెళ్ళాడు. అప్పుడు తల్లి ఇంట్లోనే ఉంది. తల్లి తన పనుల్లో ఉండగా, చిన్నారిని తనకు ఇవ్వమని అడిగి తీసుకున్నాడు. అనంతరం బాలికను పక్క గదిలోకి తీసుకెళ్లి అత్యాచారానికి పాల్పడ్డాడు.
గాయపడి, తీవ్ర భయాందోళనతో చిన్నారి ఏడవడం ప్రారంభించడంతో, తల్లి పరుగున వెళ్లి చూసింది. మొదట బాలికను ఒక ప్రైవేట్ డాక్టర్ వద్దకు తీసుకెళ్లారు.
ఈ విషయాన్ని పోలీసులకు ఫిర్యాదు చేసే బదులు, గ్రామ పంచాయితీ ముందు ఉంచారు. విషయం బయటకు రాకుండా గ్రామం లోనే పరిష్కరించుకోవాలని కొంతమంది సభ్యులు భావించారు. ఆదివారం జరిగిన సమావేశంలో, చట్టపరమైన చర్యలకు వెళ్లకుండా కేసును ఇక్కడే పరిష్కరించేలా నిందితుడికి లక్ష రూపాయల జరిమానా విధించారు.
నిందితుడు ఆ జరిమానాలో 20,000 రూపాయలు చెల్లించాడు. ఆ డబ్బుతో పంచాయితీ సభ్యులు మాంసం, మద్యం పార్టీ చేసుకున్నారు. మిగిలిన 80,000 రూపాయలను వారం రోజుల్లోగా చెల్లించాలని నిందితుడిని ఆదేశించారు.
ఘాఘ్రా పోలీస్ స్టేషన్ ఇంచార్జ్ మోహన్ కుమార్ మాట్లాడుతూ, ఈ కేసును గ్రామస్తులు అణచివేయడానికి ప్రయత్నిస్తున్నారని, గ్రామస్తుల ఒత్తిడి కారణంగానే కేసు పోలీసుల వరకు రాలేదని సమాచారం అందిందని తెలిపారు.
దీంతో ఘాఘ్రా పోలీసులు గ్రామానికి చేరుకుని, బాధితురాలి తల్లి వాంగ్మూలం ఆధారంగా కేసు నమోదు చేసి, నిందితుడిని అరెస్టు చేశారు.
గ్రామంలో జరుగుతున్న ఈ అరాచకంపై ఎవరో పోలీసులకు సమాచారం అందించారు. ఆదివారం పోలీసులు గ్రామానికి చేరుకున్నప్పుడు, జరిమానా డబ్బుతో పార్టీ జరుగుతోంది. అక్కడే నిందితుడిని అరెస్టు చేయడమే కాకుండా, బాధితురాలి తల్లి వాంగ్మూలాన్ని పోలీసులు రికార్డు చేశారు.
అరంగి పంచాయితీ హెడ్ లోడో ఎక్కా మాట్లాడుతూ, దాడి జరిగిన తర్వాత పాల్మా గ్రామంలో సమావేశం జరిగిందని, కానీ తనకు ఎవరూ సమాచారం ఇవ్వలేదని తెలిపారు. పోలీసులు వచ్చిన తర్వాతే ఈ విషయం తన దృష్టికి వచ్చిందని చెప్పారు.
పోలీసులు తెలిపిన వివరాల ప్రకారం, ఈ కేసులో తదుపరి చట్టపరమైన చర్యలు కొనసాగుతున్నాయి.