గురుగ్రామ్కు చెందిన ఒక సాఫ్ట్వేర్ ఇంజనీర్ తన కుటుంబ ఆర్థిక పరిస్థితులపై చేసిన వ్యాఖ్యలు ఇప్పుడు సోషల్ మీడియాలో పెద్ద వివాదానికి దారితీశాయి. కుటుంబంలో తానే ఏకైక సంపాదనపరుడినని, ఈ ఆర్థిక భారాన్ని మోయడం తన వల్ల కావడం లేదని ఆయన వాపోయారు.
ఏమిటా కథ? ఎక్స్ (ట్విట్టర్) వేదికగా వెలుగులోకి వచ్చిన ఈ ఉదంతం ప్రకారం, 34 ఏళ్ల సదరు వ్యక్తి గురుగ్రామ్లో సీనియర్ సాఫ్ట్వేర్ ఇంజనీర్గా పనిచేస్తున్నారు. ఆయన వార్షిక వేతనం రూ. 26 లక్షలు. పన్నులు, ఇతర తగ్గింపులు పోను, చేతికి నెలకు సుమారు రూ. 1.75 లక్షలు వస్తుందని ఆయన పేర్కొన్నారు. ఇంత మంచి జీతం వస్తున్నా, కుటుంబ ఖర్చులు పెరిగిపోవడంతో నెలాఖరుకు కేవలం రూ. 15,000 మాత్రమే పొదుపు చేయగలుగుతున్నానని ఆయన ఆవేదన వ్యక్తం చేశారు.
నెలకు ఆయన ఖర్చుల వివరాలు ఇవే:
- అద్దె: సెక్టార్ 56లో 2BHK అపార్ట్మెంట్ కోసం రూ. 40,000.
- పిల్లల ఖర్చులు: స్కూల్ ఫీజు, దుస్తులు, వైద్యం, హాబీ క్లాసుల కోసం రూ. 50,000.
- ఇంటి ఖర్చులు: కిరాణా, కరెంట్ బిల్లు, ఇంటి పనుల సహాయకుల కోసం రూ. 30,000.
- కారు ఈఎంఐ: రూ. 16,000.
- తల్లిదండ్రులకు: రాంచీలో ఉన్న తన తల్లిదండ్రుల కోసం రూ. 20,000.
భార్యపై అసహనం తన భార్య నిష మంచి తల్లి అని, బిడ్డను బాగా చూసుకుంటుందని ప్రశంసించినప్పటికీ, ఆమెపై తనకు అసంతృప్తి ఉందని ఆయన అంగీకరించారు. పెళ్లికి ముందు ఎంబీఏ చదువుతున్న తన భార్య, వివాహం తర్వాత చదువు మానేసిందని, ఆ తర్వాత చిన్నపాటి ఉద్యోగం లేదా ఇంటి నుంచే ఏదైనా వ్యాపారం చేస్తుందని ఆశించానని, కానీ అది జరగలేదని ఆయన చెప్పారు.
“నేను ఆమెను తక్కువ చేయడం లేదు. కానీ ఇద్దరూ సంపాదించే ఇతర జంటలను చూసినప్పుడు, నా పరిస్థితి చూసుకుంటే విసుగు కలుగుతోంది. మధ్య నెలకు వచ్చేసరికి నా బ్యాంక్ బ్యాలెన్స్ చూసి, కనీసం ఒక చిన్న విహారయాత్రకు కూడా వెళ్లలేనేమో అనిపిస్తుంది” అని ఆయన పేర్కొన్నారు. జీవితంలో మరింత ఉన్నత లక్ష్యాలున్న వ్యక్తిని వివాహం చేసుకుంటే బాగుండేదని ఆయన వ్యాఖ్యానించారు.
నెటిజన్ల విమర్శలు ఈ పోస్టుపై నెటిజన్లు తీవ్రంగా స్పందిస్తున్నారు. “అంత మంచి జీతం వస్తున్నా ఆర్థిక ప్రణాళిక లేకపోవడం ఆయన తప్పే”, “నిత్యం ఇంటి బాధ్యతలు చూసుకుంటూ, పిల్లలను పెంచుతున్న భార్యను తక్కువ చేసి మాట్లాడటం సరికాదు” అని చాలా మంది ఆయనను విమర్శించారు. ఒక నెటిజన్ అయితే, “నిజానికి ఆయన తన పిల్లలపై చేసే ఖర్చు కంటే తక్కువ జీతంతో నేను హాయిగా జీవిస్తున్నాను. ఇది ఆదాయ సమస్య కాదు, ఖర్చుల నిర్వహణ లోపం” అని చురకలంటించారు.
మరికొందరు నెటిజన్లు భార్యకు మద్దతుగా నిలిచారు. ఇంటిని చక్కదిద్దడం, బిడ్డను కనడం, పెంచడం వంటి బాధ్యతలను గుర్తించకుండా, ఆమెపై నిందలు వేయడం విడ్డూరమని, ఒకవేళ భార్య కూడా ఉద్యోగం చేయాలంటే, ఇంట్లో పనులు, పిల్లల బాగోగులు ఎవరు చూసుకుంటారని నిలదీశారు.