ఢాకా: బంగ్లాదేశ్ విద్యాశాఖ మంత్రి చేసిన ఒక వ్యాఖ్య ప్రస్తుతం దేశవ్యాప్తంగా రాజకీయ, సామాజిక మాధ్యమాల్లో తీవ్ర సంచలనం రేకెత్తించింది. వరదల వల్ల తీవ్రంగా నష్టపోయిన ప్రాంతాల్లో కూడా పరీక్షలు నిర్వహించాలనే ప్రభుత్వ నిర్ణయానికి వ్యతిరేకంగా విద్యార్థులు నిరసనలు చేస్తుండగా, ఆ నిరసనను విమర్శిస్తూ విద్యాశాఖ మంత్రి చేసిన వ్యాఖ్యలే ఇప్పుడు సరికొత్త మలుపు తిప్పాయి.
బంగ్లాదేశ్లో ఇటీవల కురిసిన భారీ వర్షాల వల్ల పలు జిల్లాలు వరదల్లో మునిగిపోయాయి. వేలాది కుటుంబాలు నష్టపోగా, విద్యార్థులు కూడా తీవ్ర ఇబ్బందులు ఎదుర్కొన్నారు. ఈ నేపథ్యంలో పరీక్షలను వాయిదా వేయాలని డిమాండ్ చేస్తూ విద్యార్థులు పలుచోట్ల నిరసనలు చేపట్టారు.
ఈ నిరసనలపై వ్యాఖ్యానించిన విద్యాశాఖ మంత్రి, ఆందోళన చేస్తున్న విద్యార్థులను బ్రాయిలర్ కోళ్లు అని విమర్శించినట్లు వార్తలు వచ్చాయి. ఈ వ్యాఖ్య విద్యార్థుల్లో తీవ్ర ఆగ్రహాన్ని తెప్పించింది. సోషల్ మీడియాలో కూడా మంత్రి వ్యాఖ్యలపై తీవ్ర విమర్శలు వ్యక్తమయ్యాయి.
దీంతో, ఆ విమర్శనే తమ నిరసనకు ప్రతీకగా మార్చుకున్న విద్యార్థులు బ్రాయిలర్ చికెన్ పార్టీ (Broiler Chicken Party) పేరుతో ఒక కొత్త ఉద్యమాన్ని ప్రకటించారు. అంతేకాకుండా, విద్యాశాఖ మంత్రి తన వ్యాఖ్యలకు బాధ్యత వహిస్తూ రాజీనామా చేయాలని విద్యార్థులు ప్రధాన డిమాండ్గా ముందుకు తెచ్చారు.
ఈ ఘటన భారత్లో ఇటీవల ఇంటర్నెట్లో వైరల్ అయిన క్రాక్రోచ్ జనతా పార్టీ (Cockroach Janta Party)ని గుర్తుకు తెస్తోంది. ఆ పేరు కూడా రాజకీయ వ్యంగ్యంగా, ఇంటర్నెట్ చర్చల్లో విపరీతమైన ఆదరణ పొందింది. ఇప్పుడు అదే తరహాలో, బంగ్లాదేశ్లో బ్రాయిలర్ చికెన్ పార్టీ అనే పేరు హాట్ టాపిక్గా మారింది.
ఒక చిన్న మాట ఎంతటి పెద్ద నిరసనను, కొత్త ఉద్యమాన్ని సృష్టిస్తుందనే దానికి ఈ రెండు సంఘటనలు నిదర్శనంగా నిలిచాయి. భారత్లో క్రాక్రోచ్ జనతా పార్టీ, బంగ్లాదేశ్లో బ్రాయిలర్ చికెన్ పార్టీ అనే పేర్లు ప్రస్తుతం సోషల్ మీడియా మరియు రాజకీయ చర్చల్లో వేగంగా దూసుకుపోతున్నాయి.