మనుషులకు, జంతువులకు మధ్య ఉండే బంధం ఎల్లప్పుడూ ఎల్లలు లేనిది. ఇంట్లో పెంచుకునే పెంపుడు జంతువులనే కాకుండా, వీధుల్లో తిరిగే మూగజీవాలపై ప్రేమను చూపించే మంచి మనసున్న మనుషులు ఇప్పటికీ మన మధ్యే ఉన్నారు.
అలాంటి ఒక హృదయానికి హత్తుకునే సంఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతూ చాలా మంది కళ్లల్లో నీళ్లు తెప్పిస్తోంది. అత్యవసరంగా వేరే ఊరు వెళ్లిన ఒక మహిళ, తాను ప్రతిరోజూ ఆహారం పెట్టే ఆవులు ఆకలితో అలమటించకూడదనే ఉద్దేశంతో.. ఆన్లైన్ ఫుడ్ డెలివరీ ప్లాట్ఫారమ్ ‘జోమాటో’ ద్వారా ఫుడ్ ఆర్డర్ చేసి ఆవులకు తినిపించిన నెరవేరిన ఉదంతం ఇది.
ఇన్స్టాగ్రామ్లో షేర్ చేసిన ఈ వైరల్ వీడియోలో, ఫుడ్ డెలివరీ చేయడానికి వచ్చిన డెలివరీ బాయ్కి ఆ మహిళ ఫోన్ చేసి మాట్లాడుతుంది. తాను ప్రతిరోజూ వెళ్లే గుడి దగ్గర మూడు ఆవులు ఉన్నాయా అని అడుగుతుంది. డెలివరీ బాయ్ “అవును, ఉన్నాయి” అని చెప్పగానే, తాను ఆర్డర్ చేసిన మూడు రొట్టెలను ఆ ఆవులకు ప్రేమతో తినిపించాల్సిందిగా ఆ మహిళ కోరుతుంది. ఇది విని ఆశ్చర్యపోయిన డెలివరీ బాయ్, “ఆవుల కోసమే ఈ ఫుడ్ ఆర్డర్ చేశారా?” అని అడగగా, ఆ మహిళ ఎంతో ఎమోషనల్గా సమాధానం ఇచ్చింది.
ఆ మహిళ ప్రతిరోజూ ఇంట్లో మూడు అదనపు రొట్టెలు చేసి ఆ ఆవులకు తినిపించడం అలవాటుగా చేసుకుంది. కానీ, ఆ రోజు ఒక అర్జెంట్ పని మీద ఆమె ఊరు వెళ్లాల్సి రావడంతో, ఆవులు ఆకలితో తన కోసం ఎదురుచూస్తుంటాయేమోనని ఆందోళన చెందింది. తన దినచర్యను బ్రేక్ చేయకూడదనే ఉద్దేశంతోనే ఆమె జోమాటోలో ఆర్డర్ ఇచ్చి, దాన్ని డెలివరీ బాయ్ ద్వారా ఆవులకు అందించాలనుకుంది. ఆ మహిళకు మూగజీవాలపై ఉన్న అపారమైన ప్రేమను చూసి చలించిపోయిన ఆ డెలివరీ బాయ్, ఆ ఆర్డర్ బిల్లును తన సొంత డబ్బులతో చెల్లించడమే కాకుండా, తన చేతులతోనే ఆ ఆవులకు ఎంతో ప్రేమగా ఆ రొట్టెలను తినిపించాడు.
ఈ బ్యూటిఫుల్ ఇన్సిడెంట్ ఇన్స్టాగ్రామ్లో “@themk09rider” అనే పేజీలో “జోమాటో ఫర్ కౌ” (Zomato for Cow) అనే క్యాప్షన్తో షేర్ అయింది. దీన్ని చూసిన లక్షలాది మంది నెటిజన్లు ఆ మహిళ చూపించిన ప్రేమను, తన సొంత డబ్బులు ఖర్చు చేసి ఆవులకు తినిపించిన డెలివరీ బాయ్ ఉదారత్వాన్ని మనస్ఫూర్తిగా అభినందిస్తున్నారు. “డెలివరీకి వెళ్లిన వ్యక్తి ఆవుల ఆశీస్సులు తీసుకుని తిరిగి వచ్చాడు” అని, “మంచి మనసున్న మనుషుల ఆలోచనలే ఈ ప్రపంచాన్ని ఇంకా అందంగా ఉంచుతున్నాయి” అని నెట్టింట కామెంట్ల వర్షం కురుస్తోంది.