అద్దె ఒప్పందాలలో (రెంట్ అగ్రిమెంట్స్) సాధారణంగా ‘లాక్-ఇన్ పీరియడ్’ (Lock-in Period) అనే ఒక నిబంధన ఉంటుంది. ఉదాహరణకు, 6 నెలల లాక్-ఇన్ పీరియడ్ అని ఉంటే, ఆ లోపు మీరు ఇల్లు ఖాళీ చేయడానికి వీలుండదు. ఒకవేళ ఏదైనా అత్యవసర ఉద్యోగం వల్ల లేదా ఇతర కారణాల వల్ల ఆ గడువులోపే ఇల్లు ఖాళీ చేయాల్సి వస్తే.. మీరు ఆ ఇంట్లో నివసించకపోయినప్పటికీ, ఆ మిగిలిన నెలల పూర్తి అద్దెను యజమానికి జరిమానా (పెనాల్టీ) రూపంలో చెల్లించాల్సి ఉంటుంది.
అందువల్ల, లాక్-ఇన్ పీరియడ్ ఎంత కాలం ఉంది, అత్యవసర సమయాల్లో ఇల్లు ఖాళీ చేయడానికి ఎన్ని నెలల ముందు నోటీసు ఇవ్వాలి అనే విషయాలను స్పష్టంగా చూసి సరిచేసుకోవాలి.
ఇంట్లో ఏర్పడే రోజువారీ రిపేర్లను (మరమ్మతులను) ఎవరు సరిచేయాలి అనే విషయంలో ఎప్పుడూ అద్దెకు ఉండేవారికి, ఇంటి యజమానికి మధ్య గందరగోళం నడుస్తూనే ఉంటుంది. అగ్రిమెంట్లో దీని గురించి స్పష్టంగా లేకపోతే.. పైపుల లీకేజీ, కరెంట్ ప్రాబ్లమ్స్ వంటి చిన్న చిన్న రిపేర్లకు కూడా అద్దెకు ఉండేవారే డబ్బులు ఖర్చు పెట్టాల్సిన పరిస్థితి వస్తుంది.
అందువల్ల, భవనం గోడలకు వచ్చే పగుళ్లు లేదా పైకప్పు (స్లాబ్) లీకేజీ వంటి పెద్ద పెద్ద నిర్మాణ సంబంధిత మరమ్మతులను ఇంటి యజమాని మాత్రమే సరిచేయాలని, రోజువారీ చిన్న చిన్న రిపేర్లను మాత్రమే అద్దెదారు భరిస్తాడని అగ్రిమెంట్లో స్పష్టంగా పేర్కొనాలి.
ఇల్లు ఖాళీ చేసే సమయంలో అడ్వాన్స్ (ముందస్తు నగదు) వెనక్కి తీసుకోవడంలోనే ఎక్కువ సమస్యలు ఎదురవుతుంటాయి. చాలా మంది ఇంటి యజమానులు ఇల్లు ఖాళీ చేయించేటప్పుడు పెయింటింగ్ ఛార్జీలు లేదా అరుగుదల (వేర్ అండ్ టియర్) ఖర్చులు అనే పేరుతో పెద్ద మొత్తంలో డబ్బులు మినహాయించుకుంటారు (కట్ చేసుకుంటారు).
సహజంగా జరిగే అరుగుదలకు అద్దెదారు బాధ్యుడు కాడు. అందువల్ల, ఇల్లు ఖాళీ చేసిన ఎన్ని రోజుల్లోగా అడ్వాన్స్ డబ్బును తిరిగి ఇచ్చేస్తారు అనే విషయాన్ని, అలాగే అన్యాయమైన కారణాలతో డబ్బులు కట్ చేయకూడదనే నిబంధనను అగ్రిమెంట్లో ముందే స్పష్టంగా చేర్చుకోవడం మీ సొమ్మును కాపాడుతుంది.