ఉత్తరప్రదేశ్ మీరట్ నగరం హస్తినాపూర్ ప్రాంతానికి చెందిన అతుల్ పన్వార్, దామిని అనే ఇద్దరూ ప్రేమించుకుని గత 2019వ సంవత్సరంలో వివాహం చేసుకున్నారు.
వీరికి 6 ఏళ్ల కుమారుడు ఉన్నాడు. ఇటీవల వీరు ఒక కొత్త అద్దె ఇంట్లోకి మారారు, అలాగే జీవనోపాధి కోసం ఒక ప్రైవేట్ పాఠశాలను కూడా ప్రారంభించి నడుపుతున్నారు.
ఈ నేపథ్యంలో, ఒక రోజు ఉదయం అతుల్ తన పడకగదిలో శవమై కనిపించాడు. అతని శరీరంపై పాము కాటు వేసిన గుర్తులు ఉన్నాయి. వేసవి వేడి కారణంగా తాను, తన కుమారుడు బయట పడుకున్నామని.. ఉదయం అతుల్కు టీ ఇవ్వడానికి వెళ్లినప్పుడు అతను చలనం లేకుండా పడి ఉన్నాడని, పరుపుపై ఒక విషపాము ఉందని దామిని చుట్టుపక్కల వారి వద్ద ఏడుస్తూ చెప్పింది.
మొదట్లో ఇది ఒక సాధారణ పాము కాటు వల్ల జరిగిన ప్రమాద వశాత్తు మరణమే అని అందరూ భావించారు. కానీ, అతుల్ తండ్రి తన కుమారుడి మృతిపై అనుమానం ఉందని చెబుతూ, దామిని తీవ్రంగా వ్యతిరేకించినప్పటికీ వినకుండా శవపరీక్ష (పోస్ట్మార్టం) చేయించాలని కోరారు. పోలీసులు రంగంలోకి దిగి దర్యాప్తు చేపట్టి, అతుల్ మరియు దామిని ఫోన్ కాల్ డేటాను పరిశీలించినప్పుడు ఒక దిగ్భ్రాంతికరమైన నిజం వెలుగులోకి వచ్చింది.
దామినికి, వారి పాఠశాలలో డ్రైవర్గా పనిచేస్తున్న తుషార్ అనే వ్యక్తికి మధ్య చాలా కాలంగా వివాహేతర సంబంధం ఉంది. పోలీసుల విచారణలో తలవంచిన దామిని, తన ప్రియుడు తుషార్తో కలిసి భర్తను హత్య చేయడానికి వేసిన కుట్రను అంగీకరించింది.
హత్య జరిగిన రోజు రాత్రి, దామిని తన భర్త అతుల్ తాగే పాలలో నిద్రమాత్రలు కలిపి ఇచ్చింది. అతను స్పృహ తప్పి పడిపోగానే, తుషార్ ఇద్దరు పాములు పట్టే వారితో కలిసి ఒక విషపామును తీసుకుని ఇంటికి వచ్చాడు.
ఆ పామును అతుల్ మంచంపై వదిలి అతడిని కరిపించారు. అతుల్ పేరు మీద ఉన్న 20 లక్షల రూపాయల లైఫ్ ఇన్సూరెన్స్ డబ్బును దక్కించుకోవడానికి, అలాగే తమ వివాహేతర సంబంధానికి అడ్డంగా ఉన్న అతడిని తొలగించుకోవడానికి ఈ కుట్ర పన్నారు. దీనికి సహాయం చేసిన పాములు పట్టే వారికి 5 లక్షల రూపాయలు ఇస్తానని తుషార్ ప్రామిస్ చేశాడు.
అంతేకాకుండా, 20 రోజుల ముందే అతుల్పై కారును ఎక్కించి హత్య చేయడానికి తుషార్ ప్రయత్నించాడని, అయితే హెల్మెట్ ధరించి ఉండటం వల్ల అతుల్ ప్రాణాలతో బయటపడ్డాడని విచారణలో తేలింది. ప్రస్తుతం దామిని, ఆమె ప్రియుడు మరియు ఇద్దరు పాములు పట్టే వారితో కలిపి మొత్తం నలుగురిని పోలీసులు అరెస్ట్ చేశారు.