అమెరికాతో తాత్కాలిక కాల్పుల విరమణ ఒప్పందం కుదిరిన నేపథ్యంలో, ఇరాన్లో తీవ్రమైన అంతర్గత రాజకీయ సంక్షోభం ఏర్పడింది.
అధ్యక్షుడు మసౌద్ పెజెష్కియాన్ మరియు అమెరికాతో చర్చల్లో పాల్గొన్న సీనియర్ నాయకులు కలిసి దేశంలో ‘రాజకీయ తిరుగుబాటు’ (ఆధికార మార్పిడి) కుట్రకు పాల్పడుతున్నారని ఆ దేశ తీవ్రవాద మద్దతుదారులు ఆరోపించారు. అమెరికాతో రాజీ పడటం ద్వారా, ప్రస్తుత ప్రభుత్వం ఇస్లామిక్ విప్లవం యొక్క ప్రాథమిక సూత్రాలను, సుప్రీం లీడర్ మార్గదర్శకాలను గాలికి వదిలేసిందని వారు ఆగ్రహం వ్యక్తం చేస్తున్నారు.
దివంగత ఇరాన్ సుప్రీం లీడర్ అలీ ఖమేనీ అంత్యక్రియల సమయంలో ఈ అసంతృప్తి బహిరంగంగా బద్దలైంది. CNN నివేదిక ప్రకారం, అమెరికాతో చర్చలు జరిపి కొన్ని ఆంక్షల నుండి మినహాయింపు పొందడానికి కారణమైన విదేశాంగ మంత్రి అబ్బాస్ అరాక్చీపై తీవ్రవాద ముఠా రాళ్లతో దాడి చేసింది. అతడిని ‘ద్రోహి’ అని, ‘అమ్ముడుపోయినవాడు’ అని నినాదాలు చేయడంతో, అతను ప్రాణాలు కాపాడుకోవడానికి అక్కడి నుండి పారిపోవాల్సి వచ్చింది. అదేవిధంగా, అధ్యక్షుడు పెజెష్కియాన్ను ఉద్దేశించి “రాజీ పడేవారు నశించాలి” అంటూ నినాదాలు చేశారు. అంతేకాకుండా, ప్రభుత్వ మద్దతుదారైన మతపరమైన గాయకుడు మరియు తీవ్రవాద భావాలు కలిగిన మహ్మద్ అలీ బక్షి అనే వ్యక్తి.. “అధ్యక్షుడా, సుప్రీం లీడర్ షరతులను నెరవేర్చకపోతే, మా చేతుల్లో బ్లేడు ఉంటుంది, మీ మెడ మా ముందు ఉంటుంది. మీ జీవితాన్ని నరకం చేస్తాం” అని బహిరంగంగానే హత్య చేస్తామని బెదిరించాడు.
ఈ అంతర్గత గందరగోళం మధ్య, ఇరాన్ కొత్త సుప్రీం లీడర్గా బాధ్యతలు చేపట్టాల్సిన అలీ ఖమేనీ కుమారుడు మోజ్తబా ఖమేనీ ఇంకా ప్రజల ముందుకు రాకుండా రహస్యంగా అదృశ్యం కావడం పెద్ద చర్చకు దారితీసింది. తన తండ్రి మరణం తర్వాత అతను ఇప్పటివరకు దేశ ప్రజలను ఉద్దేశించి మాట్లాడలేదు. ప్రాణభయంతో అతను దాక్కుని ఉండవచ్చని లేదా అనారోగ్యంతో బాధపడుతుండవచ్చని భయపడుతున్నారు. ఈ పరిస్థితిని అనుకూలంగా మార్చుకుని, అధ్యక్షుడు పెజెష్కియాన్, పార్లమెంట్ స్పీకర్ కాలిబాఫ్ ఇరాన్ అధికారాన్ని చేజిక్కించుకోవడానికి నాటకమాడుతున్నారని ‘జెబ్-ఎ-పాయ్దారీ’ అనే తీవ్రవాద బృందానికి చెందిన పార్లమెంట్ సభ్యుడు మహ్మద్ నబావియన్ సోషల్ మీడియాలో హెచ్చరించారు.
అయినప్పటికీ, దేశ భద్రతకు మరియు అమెరికాతో వ్యూహాత్మక చర్చలకు ముప్పుగా మారిన ఈ తీవ్రవాద గ్రూపులను ఇరాన్ ప్రభుత్వం పక్కన పెట్టడం ప్రారంభించింది. అందులో భాగంగానే, అమెరికా చర్చల రహస్య పత్రాలను లీక్ చేసి కాల్పుల విరమణను భగ్నం చేయడానికి ప్రయత్నించిన పార్లమెంట్ సభ్యుడు మహ్మద్ నబావియన్ను పార్లమెంటరీ జాతీయ భద్రతా కమిటీ నుండి స్పీకర్ కాలిబాఫ్ సంచలన నిర్ణయంతో తొలగించారు. మరోవైపు, అమెరికాతో తాత్కాలిక కాల్పుల విరమణ భగ్నం కావడంతో తీవ్రవాద మద్దతుదారులు పూర్తి స్థాయి యుద్ధాన్ని కోరుకుంటున్నారు. ఇరాన్ మాజీ విదేశాంగ మంత్రి మనౌచెహర్ మోత్తకి మాట్లాడుతూ, “ఈ ప్రాంతంలోని ఏదైనా ఒక అమెరికా సైనిక స్థావరంపై దాడి చేసి, కనీసం 100 మంది అమెరికా సైనికులను ఇరాన్ బందీలుగా అపహరించుకురావాలి” అని తీవ్రవాద సలహా ఇచ్చారు. దీంతో ఇరాన్లో అంతర్యుద్ధం లాంటి వాతావరణం నెలకొంది.