తమిళ్ లో ‘అరణ్మనై కిళి’, ‘నామ్ ఇరువర్ నమక్కు ఇరువర్’ వంటి సీరియల్స్ ద్వారా గుర్తింపు తెచ్చుకున్న నటి మోనిషా, ప్రస్తుతం ‘సెకండ్ లవ్’ అనే రియాలిటీ షోలో తన వివాహ జీవితానికి సంబంధించిన దిగ్భ్రాంతికరమైన విషయాలను పంచుకుంది.
2017లో వివాహం చేసుకున్న ఆమె.. తన భర్త తనను నిరంతరం వేధించేవాడని, పడకగదిలో తన అనుమతి లేకుండా రహస్యంగా ఫోటోలు, వీడియోలు తీసి తన స్నేహితులకు చూపిస్తూ బెదిరింపులకు గురిచేశాడని కన్నీరుమున్నీరైంది. ఆమె వ్యక్తిగత గోప్యతను (ప్రైవసీ) దెబ్బతీస్తూ హింసకు పాల్పడిన భర్త ప్రవర్తన అందరినీ షాక్కు గురిచేస్తోంది.
నటనారంగంలోకి వెళ్లకుండా అడ్డుకోవడమే కాకుండా, మోనిషా సంపాదించిన డబ్బును దుర్వినియోగం చేయడం, ఆమె విడాకులు కోరినప్పుడు 100 సవర్ల బంగారాన్ని ఇవ్వకుండా ఇబ్బంది పెట్టడం ఆమెను తీవ్ర వేదనకు గురిచేసింది.
చివరికి, భారీ మొత్తాన్ని నష్టపరిహారంగా ఇచ్చి విడాకులు పొందినప్పుడు.. తాను పొందిన ఆనందాన్ని జడ్జి ముందే గెంతులేస్తూ సెలబ్రేట్ చేసుకున్నట్లు ఆమె పేర్కొంది.
గత జీవితం ఇచ్చిన భయం కారణంగా, ఇప్పుడు కూడా ఎవరైనా తన పక్కన ఉంటే రహస్యంగా ఫోటోలు తీస్తున్నారేమోనని భయపడే పరిస్థితిలో ఆమె ఉండటం.. ఆమె అనుభవించిన నరకయాతనను కళ్ళకు కడుతోంది.