రైల్వే లేని దేశాలా?! 21వ శతాబ్దంలోనూ రైలు సర్వీసులు లేని ఆ దేశాలు ఏవో తెలుసా?

భారతదేశంలో రైలు ప్రయాణం అనేది సామాన్య ప్రజల దైనందిన జీవితంలో అత్యంత కీలకమైన రవాణా సాధనం.

ప్రపంచవ్యాప్తంగా రైల్వే నెట్‌వర్క్ బుల్లెట్ వేగంతో విస్తరిస్తున్న ప్రస్తుత రోజుల్లో కూడా, కొన్ని దేశాల్లో ఇప్పటికీ అసలు రైలు కూత వినిపించకపోవడం ఆశ్చర్యం కలిగిస్తుంది. కొన్ని దేశాల్లో భౌగోళిక పరిస్థితుల వల్ల అసలు రైల్వే ట్రాక్‌లే వేయకపోగా, మరికొన్ని దేశాల్లో పాత రైల్వే సేవలు నిలిచిపోయాయి.

ఈ జాబితాలో మన పొరుగు దేశమైన భూటాన్ ప్రధానమైనది. భూటాన్‌లో ప్రస్తుతం ఎలాంటి రైలు సేవలు లేవు. అయితే భవిష్యత్తులో భారతీయ రైల్వేతో అనుసంధానించేలా సరిహద్దు రైలు ప్రాజెక్టులను చేపట్టేందుకు ముమ్మర ప్రయత్నాలు జరుగుతున్నాయి.

యూరప్‌లోని అండోరా (Andorra) దేశంలో కూడా రైల్వే లైన్లు లేవు. చిన్న దేశం కావడం, చుట్టూ కొండలు-గుట్టలతో నిండి ఉండటం వల్ల అక్కడ రైల్వే వ్యవస్థ అభివృద్ధి చెందలేదు. ఇక్కడి ప్రజలు రైలు ప్రయాణం చేయాలంటే పక్కనే ఉన్న ఫ్రాన్స్ లేదా స్పెయిన్ దేశాలకు బస్సుల్లో వెళ్లాల్సి ఉంటుంది.

అదేవిధంగా లిబియా, సైప్రస్, కువైట్, ఈస్ట్ తైమూర్ (తూర్పు తైమూర్) దేశాలు కూడా ఈ లిస్ట్‌లో ఉన్నాయి. అంతర్యుద్ధం కారణంగా లిబియాలో రైల్వే వ్యవస్థ పూర్తిగా ధ్వంసమై నిలిచిపోయింది. సైప్రస్‌లో లాభసాటిగా లేకపోవడంతో చాలా ఏళ్ల క్రితమే పాత రైల్వే సర్వీసులను మూసేశారు. కువైట్‌లో ప్రస్తుతం లోకల్ రైళ్లు లేనప్పటికీ, భవిష్యత్ గల్ఫ్ రైల్వే ప్రాజెక్టులపై ప్రణాళికలు రచిస్తున్నారు. ఇక తూర్పు తైమూర్‌లో ఇప్పటివరకు ఎలాంటి రైల్వే లైన్ నిర్మించలేదు; అక్కడ కేవలం రోడ్డు రవాణాయే ప్రధాన ఆధారంగా ఉంది.