దైవ సన్నిధిగా, అత్యంత పవిత్రమైన పుణ్యక్షేత్రంగా భావించే గుడి గర్భగుడిలోనే జరిగిన ఒక ఘోరమైన అకృత్యం యావత్ హైదరాబాద్ను ఉలిక్కిపడేలా చేసింది.
హైదరాబాద్లోని రామచంద్రాపురం పరిధిలోని ఒక ఆలయంలో బాలికపై వృద్ధ పూజారి అసభ్యకరంగా ప్రవర్తించిన ఉదంతం స్థానికంగా తీవ్ర ఆగ్రహావేశాలకు దారితీసింది.
రామచంద్రాపురంలోని స్థానిక ఆలయంలో సాయం అనే వృద్ధుడు పూజారిగా పనిచేస్తున్నాడు. ఘటన జరిగిన సమయంలో గర్భగుడి తలుపులు అనుమానాస్పదంగా లోపలి నుంచి మూసి ఉండటాన్ని గమనించిన స్థానికులకు, పెద్దలకు తీవ్ర అనుమానం వచ్చింది.
వెంటనే వారు ఏమాత్రం ఆలస్యం చేయకుండా ఆలయ తలుపులు తెరిచి లోపలికి వెళ్లి చూడగా.. పవిత్రమైన గర్భగుడిలోనే ఆ పూజారి ఒక మైనర్ బాలికపై అసభ్యకరంగా లైంగిక వేధింపులకు పాల్పడుతూ కనిపించాడు. కళ్లముందు కనిపిస్తున్న దృశ్యాన్ని చూసి స్థానికులు నిర్ఘాంతపోయారు.
ఆలయ పవిత్రతను కాలరాస్తూ చేసిన ఈ దుశ్చర్యపై రగిలిపోయిన భక్తులు, స్థానికులు ఆ పూజారిని పారిపోకుండా రెడ్ హ్యాండెడ్గా పట్టుకుని బంధించారు. అనంతరం వెంటనే రామచంద్రాపురం పోలీసులకు సమాచారం అందించారు.
సమాచారం అందిన వెంటనే రంగంలోకి దిగిన పోలీసులు, బాలికను సురక్షితంగా రక్షించారు. నిందితుడైన పూజారి సాయంను అదుపులోకి తీసుకుని పోలీస్ స్టేషన్కు తరలించి విచారణ ప్రారంభించారు. ఆలయంలో ఇలాంటి అసాంఘిక కార్యకలాపాలు జరగడం ఇదే మొదటిసారి కాదని, గతంలోనూ ఫిర్యాదులు వచ్చాయని స్థానికులు ఆవేదన వ్యక్తం చేశారు.
బాధిత బాలిక మైనర్ కావడంతో నిబంధనల ప్రకారం వివరాలను గోప్యంగా ఉంచిన పోలీసులు, ఆమెకు వైద్య పరీక్షలు నిర్వహించి వాంగ్మూలాన్ని నమోదు చేసుకున్నారు. నిందితుడిపై పోక్సో (POCSO) చట్టం కింద కఠిన సెక్షన్లతో కేసు నమోదు చేసి పోలీసులు సమగ్ర దర్యాప్తు జరుపుతున్నారు.