నేటి కార్పొరేట్ కల్చర్లో పని వేళలు ముగిసిన తర్వాత కూడా ఉద్యోగులకు ఫోన్లు, మెయిల్స్ చేయడం సర్వసాధారణమైపోయిన తరుణంలో, ఒక వ్యాపారవేత్త (ఫౌండర్) తన ఉద్యోగుల విశ్రాంతి కోసం ఒక సాహసోపేతమైన నిర్ణయం తీసుకున్నారు.
తన కంపెనీలో సాయంత్రం 6 గంటల తర్వాత ఏ ఒక్క ఉద్యోగి కూడా పనిచేయకూడదనే కఠినమైన ‘6 PM రూల్’ను ప్రవేశపెట్టి అందరి దృష్టినీ ఆకర్షించారు.
క్లయింట్ల అత్యవసర పనుల పేరుతో ఉద్యోగుల వ్యక్తిగత సమయాన్ని లాక్కోవడం సరైన పద్ధతి కాదని ఆ సంస్థ వ్యవస్థాపకుడు స్పష్టం చేశారు. దీనివల్ల కొంతమంది కస్టమర్లను, వ్యాపార అవకాశాలను కోల్పోవాల్సి వచ్చినా పర్వాలేదని.. ఉద్యోగుల కుటుంబ జీవితం, వారి మానసిక ప్రశాంతతే తమకు అత్యంత ముఖ్యమని ఆయన తేల్చిచెప్పారు.
నేటి డిజిటల్ యుగంలో స్మార్ట్ఫోన్లు, ఈమెయిళ్ల కారణంగా ఆఫీస్ టైమింగ్స్ దాటిన తర్వాత కూడా ఉద్యోగులు పనితోనే గడపాల్సి వస్తోంది. ఫలితంగా వారు మానసికంగా పని ఒత్తిడి నుంచి బయటపడలేకపోతున్నారు. సాయంత్రం 6 గంటల వరకే పని అనే స్పష్టమైన పరిమితి ఉండటం వల్ల, ఉద్యోగులు తమ కుటుంబంతో ఆనందంగా గడపడానికి, వ్యక్తిగత అలవాట్లకు సమయం కేటాయించుకోవడానికి వీలవుతుంది.
ఎక్కువ గంటలు ఆఫీసులోనే గడపడం కంటే, నిర్దేశిత సమయంలో ఎంత నాణ్యంగా పనిచేశామన్నదే నిజమైన ఉత్పాదకత. ప్రతిభావంతులైన ఉద్యోగులను ఆకర్షించాలన్నా, వారిని సంస్థలో నిలుపుకోవాలన్నా కేవలం మంచి జీతాలు మాత్రమే సరిపోవని, వారి వ్యక్తిగత జీవితానికి ఇచ్చే గౌరవం కూడా ఎంతో కీలకమని ఈ నిర్ణయం చాటిచెబుతోంది.
కస్టమర్లను కోల్పోవడం స్వల్పకాలంలో నష్టంగా అనిపించినప్పటికీ.. ఎలాంటి అలసట లేకుండా ఉత్సాహంగా పనిచేసే ఉద్యోగుల వల్ల భవిష్యత్తులో కంపెనీ ఉత్పాదకత, సృజనాత్మకత మరింత పెరుగుతాయని నిపుణులు ప్రశంసిస్తున్నారు.