ప్రోస్టేట్ క్యాన్సర్ (Prostate Cancer) అనేది పురుషుల ప్రోస్టేట్ గ్రంథిలో ఉత్పన్నమయ్యే ఒక తీవ్రమైన సమస్య. ప్రారంభ దశలో కొందరిలో ఎలాంటి స్పష్టమైన లక్షణాలు కనిపించకపోవచ్చు.
అందుకే పురుషులు క్రమం తప్పకుండా హెల్త్ చెకప్లు చేయించుకోవాల్సిన ఆవశ్యకతను గుర్తించాలి. ముఖ్యంగా వయసు పైబడే కొద్దీ మూత్ర విసర్జనలో ఏవైనా మార్పులు గమనిస్తే, వాటిని “వయసు పెరగడం వల్ల వచ్చే సహజ లక్షణాలు” అని నిర్లక్ష్యం చేయకుండా సరైన వైద్య సలహా తీసుకోవడం ముఖ్యం.
తరచూ మూత్రవిసర్జనకు వెళ్లాల్సి రావడం, ముఖ్యంగా రాత్రి వేళల్లో పదే పదే మెలకువ రావడం, యూరిన్ పోయడం ప్రారంభించడంలో ఇబ్బంది కలగడం, మూత్రం సన్నని ధారగా రావడం లేదా మూత్రాశయం పూర్తిగా ఖాళీ కాలేదన్న భావన కలగడం వంటి లక్షణాలు కనిపిస్తుంటాయి. అయితే ఇలాంటి లక్షణాలు కేవలం ప్రోస్టేట్ క్యాన్సర్ వల్లే కాకుండా, ప్రోస్టేట్ గ్రంథి సాధారణ వాపు (BPH) వల్ల కూడా రావొచ్చు.
కొందరిలో మూత్రం లేదా వీర్యంలో రక్తం పడటం, నడుము, తుంటి లేదా తొడ భాగాల్లో నిరంతరం నొప్పి, ఎలాంటి కారణం లేకుండానే అకస్మాత్తుగా బరువు తగ్గడం వంటి తీవ్ర లక్షణాలు కనిపించవచ్చు. ముఖ్యంగా కొత్తగా మొదలై చాలా కాలం పాటు వేధించే ఇలాంటి మార్పులను అస్సలు విస్మరించకూడదు. వ్యాధిని ప్రాథమిక దశలోనే గుర్తిస్తే ఎన్నో అధునాతన చికిత్సా పద్ధతుల ద్వారా నయం చేయవచ్చు.
అయితే ఈ లక్షణాలు కనిపించిన వెంటనే క్యాన్సర్ అని తీవ్ర భయాందోళనలకు గురికావాల్సిన అవసరం లేదు. వైద్యులు పీఎస్ఏ (PSA) టెస్ట్ వంటి అవసరమైన పరీక్షలు నిర్వహించి అసలు కారణాన్ని నిర్ధారిస్తారు. వయసు, కుటుంబంలో ఎవరికైనా క్యాన్సర్ ఉన్న చరిత్ర వంటి అంశాలను బట్టి వైద్యుల పర్యవేక్షణలో తగిన పరీక్షలు చేయించుకోవడం, లక్షణాలు కనిపించిన వెంటనే చికిత్స పొందడం ఎంతో శ్రేయస్కరం.