ఆంధ్రప్రదేశ్లోని విజయనగరం జిల్లా, గొడకొమ్ము గ్రామంలో గుండెల్ని పిండేసే విషాద ఘటన చోటుచేసుకుంది.
ప్రేమ వ్యవహారంలో తలెత్తిన పెళ్లి వివాదం ఇద్దరు యువతీయువకుల ప్రాణాలను బలిగొనడం ఆ గ్రామాన్నే తీవ్ర శోకసంద్రంలో ముంచెత్తింది.
వివరాల్లోకి వెళితే.. గ్రామానికి చెందిన వోనివి దేవకీ నందన్, అదే ఊరికి చెందిన ఒక యువతి కొంతకాలంగా ప్రేమించుకుంటున్నారు. నందన్ తన ప్రేమ విషయాన్ని ఇంట్లో చెప్పగా, ఇరు కుటుంబాలు అంగీకరించి పెళ్లి చర్చలు ప్రారంభించాయి.
అయితే, యువతికి వయసు తక్కువగా ఉండటంతో నందన్ కుటుంబ సభ్యులు వివాహానికి కొంత సమయం కావాలని కోరారు. దీంతో ఇరు కుటుంబాల మధ్య చిన్నపాటి మనస్పర్థలు వచ్చి వ్యవహారం పోలీస్ స్టేషన్ వరకు వెళ్లింది. ఆ తర్వాత గ్రామ పెద్దలు జోక్యం చేసుకుని ఇరువర్గాలకు సర్దిచెప్పి రాజీ కుదిర్చారు.
ఈ క్రమంలో గత ఆదివారం రాత్రి యువతి బంధువులు నందన్ ఇంటికి వెళ్లి, వెంటనే పెళ్లి జరిపించాలంటూ తీవ్రంగా ఒత్తిడి తెచ్చారు. నందన్ కుటుంబం మరికొంత సమయం అడగడంతో ఇరు వర్గాల మధ్య తీవ్ర వాగ్వాదం చోటుచేసుకుంది.
ఈ గొడవతో తీవ్ర మనస్తాపానికి గురైన నందన్, అర్ధరాత్రి అందరూ నిద్రపోయిన తర్వాత ఇంట్లో నుంచి వెళ్లిపోయి.. సమీపంలో నిర్మిస్తున్న తన కొత్త ఇంట్లోనే ఉరేసుకుని బలవన్మరణానికి పాల్పడ్డాడు. ఉదయం కుమారుడి కోసం వెతికిన తల్లిదండ్రులు, అతడి మృతదేహాన్ని చూసి గుండెలవిసేలా రోదించారు.
తన ప్రియుడు చనిపోయాడన్న వార్త తెలిసిన ఆ యువతి ఆ షాక్ను ఏమాత్రం తట్టుకోలేకపోయింది. ప్రియుడి ఎడబాటును భరించలేక ఆమె కూడా మరుసటి రోజు తెల్లవారుజామున అదే రీతిలో ఉరేసుకుని ఆత్మహత్య చేసుకుంది.
కేవలం 24 గంటల వ్యవధిలోనే ప్రేమజంట ఇలా ఒకరి తర్వాత ఒకరు ప్రాణాలు తీసుకోవడం స్థానికంగా తీవ్ర విషాదాన్ని, కలకలాన్ని రేపింది. గుర్ల (Gurla) పోలీసులు ఇరు మృతదేహాలను స్వాధీనం చేసుకుని పోస్టుమార్టం నిమిత్తం ఆసుపత్రికి తరలించి, కేసు నమోదు చేసుకుని ముమ్మర దర్యాప్తు చేస్తున్నారు.