అమెరికన్ వ్యాపారవేత్త, ‘మైక్రోస్ట్రాటజీ’ (MicroStrategy) సంస్థ వ్యవస్థాపకుడు మైఖేల్ సేలర్… ChatGPT సహాయంతో ఏకంగా రూ.1,42,708 కోట్ల నిధులను ఎలా సమీకరించారో ‘డైరీ ఆఫ్ ఏ సీఈవో’ (Diary of a CEO) పాడ్కాస్ట్లో పంచుకున్నారు.
ఆర్టిఫిషియల్ ఇంటెలిజెన్స్ (AI)ను కేవలం పనులను సులభతరం చేసుకోవడానికే పరిమితం చేయకుండా, ఆర్థిక రంగంలో ఇప్పటివరకు ఎవరూ ప్రయత్నించని సరికొత్త నిధుల సమీకరణ మోడల్ను రూపొందించడమే ఆయన విజయానికి ప్రధాన కారణం.
2021 నుండి ఆయన సంస్థ భారీ స్థాయిలో బిట్కాయిన్లను కొనుగోలు చేస్తోంది. దీంతో బిట్కాయిన్ ధరల్లో వచ్చే హెచ్చుతగ్గులకు అనుగుణంగా ఆయన ఆస్తి విలువ కూడా మారుతూ ఉండేది. ఈ క్రమంలో కంపెనీ మూలధనాన్ని పెంచడంతో పాటు బిట్కాయిన్లలో నిరంతరం పెట్టుబడి పెట్టేందుకు, 2025లో ChatGPT సహాయంతో ‘పర్పెచువల్ ప్రిఫర్డ్ స్టాక్’ (Perpetual Preferred Stock) అనే కొత్త తరహా షేర్ల విధానాన్ని ఆయన రూపొందించారు.
STRK, STRF పేరుతో జారీ చేసిన ఈ ప్రత్యేక షేర్ల ద్వారా వచ్చిన పెట్టుబడులను పూర్తిగా బిట్కాయిన్లను కొనుగోలు చేయడానికే ఉపయోగించారు. ఇప్పటివరకు ఏ సంస్థ కూడా కేవలం బిట్కాయిన్ల కొనుగోలు కోసమే ఇలాంటి పెట్టుబడి పథకాన్ని తీసుకురాలేదు, దీంతో వాల్స్ట్రీట్ బ్యాంకర్లు, న్యాయ నిపుణులు మొదట్లో ఎన్నో సందేహాలు లేవనెత్తారు.
అయినప్పటికీ, గతంలో బిట్కాయిన్ ధర పతనమై సంస్థ సాధారణ షేర్ల విలువ దాదాపు 80% వరకు క్షీణించినప్పటికీ మైఖేల్ సేలర్ తన వ్యూహాన్ని మార్చుకోలేదు. మార్కెట్ ఒడుదొడుకులను తట్టుకోవడానికి, రుణాల వడ్డీలు, వాటాదారులకు డివిడెండ్లు చెల్లించడానికి సంస్థ కొన్ని బిట్కాయిన్లను విక్రయించింది.
అంతేకాకుండా, రాబోయే రెండేళ్ల నిర్వహణ ఖర్చుల కోసం సురక్షితంగా 4 బిలియన్ డాలర్ల నగదు నిల్వలను కూడా కంపెనీ ఏర్పాటు చేసుకుంది. ఈ సందర్భంగా ఆయన మాట్లాడుతూ — “AI చేయగలిగే సాధారణ విషయాలను నేర్చుకోవడం కంటే, ఇప్పటివరకు ఎవరూ చేయని సరికొత్త పనిని AI ద్వారా ఎలా చేయించాలో నేర్చుకోవడమే అసలైన విజయం” అని పేర్కొన్నారు.