మహిళల ఆరోగ్యంలో ఎక్కువగా చర్చించబడే సమస్యలలో PCOS (పాలిసిస్టిక్ ఓవరీ సిండ్రోమ్) ఒకటి. ఇది హార్మోన్ల అసమతుల్యత వల్ల వచ్చే సమస్య.
ఈ సమస్య క్రమం తప్పిన రుతుచక్రం (పీరియడ్స్), బరువు పెరగడం, మొటిమలు, జుట్టు రాలడం మరియు ముఖంపై అవాంఛిత రోమాలు రావడం వంటి లక్షణాలతో బయటపడుతుంది. యుక్తవయసులోనే బయటపడే ఈ సమస్యలో లక్షణాలు తగ్గినంత మాత్రాన అది పూర్తిగా తగ్గిపోయిందని అర్థం కాదు. వయసు పెరిగే కొద్దీ దీన్ని నిరంతరం అదుపులో ఉంచుకోవడం ఒక దీర్ఘకాలిక సవాలుగా మారుతుంది.
ఉదాహరణకు 13 ఏళ్ల వయసులో PCOS నిర్ధారణ అయిన ఒక యువతి, 23 ఏళ్ల వయసులో బరువు తగ్గి లక్షణాలను అదుపులోకి తెచ్చుకుంది. అయితే పని ఒత్తిడి వల్ల శారీరక శ్రమ తగ్గి మళ్లీ బరువు పెరిగినప్పుడు, క్రమం తప్పిన పీరియడ్స్, తీవ్రమైన అలసట వంటి లక్షణాలు మళ్లీ మొదలయ్యాయి. PCOS అనేది జీవితాంతం పర్యవేక్షించుకోవాల్సిన ఒక సమస్య. హార్మోన్ల అసమతుల్యత, ఇన్సులిన్ నిరోధకత వల్ల వచ్చే మార్పుల కారణంగా, “బరువు తగ్గితే మాత్రమే PCOS పూర్తిగా నయమవుతుంది” అని చెప్పడం పూర్తిగా నిజం కాదు.
అంతేకాకుండా, PCOS శారీరక ఆరోగ్యాన్నే కాకుండా మానసిక ఆరోగ్యాన్ని కూడా తీవ్రంగా ప్రభావితం చేస్తుంది. నిరంతరం అలసటగా అనిపించడం, వ్యాయామం చేయడానికి శక్తి లేకపోవడం, ఆహారంపై అమితమైన కోరికలు (ఫుడ్ క్రేవింగ్స్) కలగడం వంటివి ఎంతోమంది మహిళలకు పెద్ద సవాలుగా మారతాయి. దీనివల్ల “ఎంత ప్రయత్నించినా సమస్య మళ్లీ మొదటికే వస్తోంది” అనే మానసిక ఒత్తిడి కూడా వారిలో పెరుగుతుంది. అయితే లక్షణాలు మళ్లీ కనిపించినంత మాత్రాన అది మీ ప్రయత్న లోపం కాదని గుర్తించాలి.
PCOSను అదుపులో ఉంచడానికి కఠినమైన డైటింగ్ లేదా హఠాత్తుగా తీవ్రమైన వ్యాయామాలు చేయడానికంటే, ఎక్కువ కాలం పాటు కొనసాగించగలిగే సరళమైన ఆరోగ్యకర అలవాట్లను అలవర్చుకోవాలి. ఆహారంలో తృణధాన్యాలు, కూరగాయలు, పప్పుదినుసులు, ప్రొటీన్లు అధికంగా ఉండే పదార్థాలను సమతుల్యంగా తీసుకోవాలి. వైద్యులు లేదా న్యూట్రిషన్ నిపుణుల సలహా లేకుండా ఎక్కువ సమయం పాటు పస్తులు ఉండటం (స్టార్వేషన్) వంటి కఠినమైన పద్ధతులకు దూరంగా ఉండాలి.
పీరియడ్స్ క్రమం తప్పడం, హఠాత్తుగా బరువు పెరగడం, తీవ్రంగా జుట్టు రాలడం వంటి సమస్యలు కొనసాగితే వెంటనే వైద్య సలహా తీసుకోవడం అవసరం. అతి తక్కువ సమయంలో “పూర్తిగా నయమైపోవాలి” అనే లక్ష్యాన్ని పెట్టుకోకుండా… శారీరక స్థితి, జీవక్రియ (మెటబాలిజం), మానసిక ఆరోగ్యాన్ని నిరంతరం గమనించుకోవడం ముఖ్యం. నిజ జీవితంలో దీర్ఘకాలం పాటించగలిగే ఆరోగ్యకరమైన జీవనశైలిని అలవర్చుకోవడమే PCOSను ఎదుర్కొనే ఉత్తమ మార్గం.