భారతదేశంలో వేగంగా విస్తరిస్తున్న తీవ్రమైన ఆరోగ్య సమస్యలలో మధుమేహం (షుగర్ వ్యాధి) ఒకటిగా నిలుస్తోంది.
ఇది పట్టణ ప్రాంతాల ప్రజలకు మాత్రమే పరిమితమైన సమస్య అనే పరిస్థితి మారిపోయి, ఇప్పుడు పల్లెల్లోనూ ఆందోళన కలిగించే స్థాయిలో పెరుగుతోంది. గతంలో అంచనా వేసిన దానికంటే దేశంలో మధుమేహ బాధితుల సంఖ్య చాలా ఎక్కువగా ఉందని ఇండియన్ కౌన్సిల్ ఆఫ్ మెడికల్ రీసెర్చ్ (ICMR) నిర్వహించిన అధ్యయనంలో వెల్లడైంది.
దేశవ్యాప్తంగా నిర్వహించిన ఈ సర్వేలో 20 ఏళ్లు పైబడిన లక్ష మందికి పైగా ప్రజలు పాల్గొన్నారు. ఇందులో మొత్తం జనాభాలో మధుమేహం బాధితుల శాతం 11.4 శాతంగా ఉండగా, ప్రీ-డయాబెటిస్ (మధుమేహం రావడానికి ముందు దశ) ఉన్నవారి శాతం 15.3 శాతంగా నమోదైంది. అంతేకాకుండా, పట్టణాలతో పోలిస్తే గ్రామీణ ప్రాంతాల్లోనూ దీని ప్రభావం క్రమంగా పెరుగుతూ ప్రత్యేక దృష్టి సారించాల్సిన స్థాయికి చేరిందని ఈ సర్వే స్పష్టం చేస్తోంది.
డయాబెటిస్ ముప్పును పెంచే అంశాలలో పెరుగుతున్న వయస్సు, కుటుంబ చరిత్ర (వంశపారంపర్యం), ఊబకాయం, పొట్ట భాగంలో కొవ్వు పేరుకుపోవడం, అధిక రక్తపోటు (బీపీ) మరియు శారీరక శ్రమ లేకపోవడం వంటివి ప్రధానమైనవి. ముఖ్యంగా, శారీరక శ్రమ ఏమాత్రం లేకుండా అధిక బరువుతో ఉండేవారికి ఈ వ్యాధి ముప్పు మరింత ఎక్కువ.
కాబట్టి, కుటుంబంలో మధుమేహ చరిత్ర ఉన్నవారే కాకుండా.. వయసు పైబడుతున్నవారు, అధిక బరువు ఉన్నవారు, బీపీ ఉన్నవారు మరియు శారీరక శ్రమ తక్కువగా ఉండేవారు తమ ఆరోగ్యంపై ప్రత్యేక శ్రద్ధ పెట్టాలి. మధుమేహాన్ని ప్రారంభ దశలోనే గుర్తించడానికి ఎప్పటికప్పుడు వైద్యుల సలహాతో అవసరమైన పరీక్షలు చేయించుకోవడం, రోజువారీ శారీరక శ్రమను పెంచడం మరియు ఆరోగ్యకరమైన ఆహారపు అలవాట్లను పాటించడం ఎంతో ముఖ్యం.