జాగ్రత్త సుమా..! “ఇకపై నా వల్ల నటించడం చేతకాదు!”. ఉద్యోగానికి రాజీనామా చేసి యువతి చెప్పిన చేదు నిజం.. నెట్టింట వైరల్ అవుతున్న ఆవేదన.!!

కార్పొరేట్ కంపెనీలలో పనిచేసే ఎంతో మంది ఉద్యోగుల పరిస్థితికి అద్దం పట్టేలా ఓ యువతి షేర్ చేసిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.

ఓ కార్పొరేట్ కంపెనీలో తాను చేస్తున్న ఉద్యోగానికి ఇటీవల రాజీనామా చేసిన ఒక ఇన్‌స్టాగ్రామ్ యూజర్.. తన పని అనుభవాల గురించి కుండబద్దలు కొట్టినట్లు మాట్లాడారు. ఆఫీసులో కేవలం కష్టపడి, అద్భుతంగా పనిచేసినంత మాత్రాన గుర్తింపు గానీ, విజయంగానీ దక్కవనే కఠినమైన నిజాన్ని ఆమె ఆ వీడియోలో పంచుకున్నారు.

కార్పొరేట్ ప్రపంచంలో నెగ్గుకురావాలంటే ఇచ్చిన పనిని సక్రమంగా పూర్తి చేస్తే మాత్రమే సరిపోదని ఆమె పేర్కొన్నారు. ఎప్పుడూ తమను తాము ప్రమోట్ చేసుకోవడం, అందరికంటే ముందుండి ఎక్కువగా మాట్లాడటం, ఉన్నతాధికారులతో నెట్‌వర్కింగ్ పెంచుకోవడం ఇక్కడ అలిఖిత నిబంధనలుగా మారాయని ఆమె గుర్తుచేశారు. ఒకసారి తన పనితీరును మెచ్చుకున్న మేనేజర్.. కంపెనీలో తనకంటూ ఒక ఇమేజ్ పెంచుకోవాలని, అందరికీ కనిపించేలా ఉండాలని (విజిబిలిటీ) చెప్పిన విషయాన్ని ఆమె ప్రస్తావించారు. ఇలాంటి విపరీతమైన అంచనాలు, కేవలం తమ పని తాము చేసుకుపోయే అంతర్ముఖులైన (Introverts) ఉద్యోగులకు తీవ్ర మానసిక ఒత్తిడిని కలిగిస్తాయని ఆమె ఆవేదన వ్యక్తం చేశారు.

ప్రస్తుత కార్పొరేట్ పని సంస్కృతి కేవలం ఎక్కువగా మాట్లాడే, బహిర్ముఖులైన (Extroverts) వ్యక్తుల కోసం మాత్రమే రూపొందించబడిందనేది ఆమె ప్రధాన విమర్శ. దీనివల్ల ప్రశాంతంగా, నిశ్శబ్దంగా పనిచేసేవారు తమ సహజ స్వభావాన్ని చంపుకుని నకిలీగా నటించాల్సిన దుస్థితి ఏర్పడుతోందని వాపోయారు. ఆమె పంచుకున్న ఈ వీడియోకు నెటిజన్ల నుంచి విశేష మద్దతు లభిస్తోంది. “ఇందులో మీ తప్పేమీ లేదు.. మీ స్వభావానికి ఏమాత్రం సరిపోని ఒక వ్యవస్థలో మీరు ఇమడలేక పోరాడుతున్నారు” అంటూ తనలాంటి ఎందరో ఉద్యోగులకు ధైర్యం చెబుతూ ఆమె తన సందేశాన్ని ముగించారు.