మహిళలూ తస్మాత్ జాగ్రత్త..! పరిచయస్తుడైన మిత్రుడే కాలయముడిగా మారిన వైనం.. నకిలీ నగ్న చిత్రాలతో వేధించిన యువకుడు.. తట్టుకోలేక యువతి బలవన్మరణం!

కర్ణాటక రాష్ట్రం బేలమక్కి ప్రాంతానికి చెందిన వాణిశ్రీ (22) అనే యువతి, బెంగళూరులోని ఒక ప్రముఖ జ్యువెలరీ షోరూంలో ఉద్యోగం చేస్తూ జీవనం సాగిస్తోంది.

కాలేజీ రోజుల్లో ఆమెతో కలిసి చదువుకున్న అభిషేక్ అనే యువకుడు, తన ప్రేమను వాణిశ్రీ నిరాకరించిందన్న కోపంతో ఆమెను నిరంతరం వేధింపులకు గురిచేయడం మొదలుపెట్టాడు. ఒకానొక దశలో విచక్షణ మరిచిన ఆ యువకుడు, వాణిశ్రీ ఫొటోలను మార్ఫింగ్ చేసి అసభ్యకర నగ్న చిత్రాలుగా తయారుచేసి, తన లైంగిక కోరిక తీర్చాలంటూ బ్లాక్‌మెయిల్ చేయడం ప్రారంభించాడు. పోలీసులకు ఫిర్యాదు చేస్తానని వాణిశ్రీ హెచ్చరించినప్పటికీ, ఆ ఫొటోలను సోషల్ మీడియాలో లీక్ చేసి పరువు తీస్తానంటూ బెదిరింపులకు దిగి ఆమెకు తీవ్ర మానసిక క్షోభను మిగిల్చాడు.

ఈ వరుస వేధింపులను, బెదిరింపులను భరించలేక తీవ్ర మనస్తాపానికి గురైన వాణిశ్రీ, తన చెల్లెలికి ఒక భావోద్వేగ లేఖ (సూసైడ్ నోట్) రాసిపెట్టి చెరువులో దూకి ఆత్మహత్య చేసుకుంది. ఆ లేఖలో, తన చావుకు అభిషేక్ చేసిన వేధింపులే కారణమని పేర్కొంటూ, తన కుటుంబంపై ఉన్న ప్రేమాభిమానాలను తెలియజేసింది. తనను ఇంతటి దారుణానికి గురిచేసిన ఆ నిందితుడికి కఠిన శిక్ష పడేలా చూడాలని కోరింది.

సమాచారం అందుకున్న పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం తరలించారు. ఈ ఘటనపై కేసు నమోదు చేసిన పోలీసులు, ప్రస్తుతం పరారీలో ఉన్న నిందితుడు అభిషేక్‌ను పట్టుకునేందుకు ప్రత్యేక బృందాలను రంగంలోకి దింపి ముమ్మరంగా గాలిస్తున్నారు.