పసిఫిక్ మహాసముద్రంలో బలపడుతున్న ఎల్ నినో (El Niño) ప్రస్తుతం ప్రపంచవ్యాప్తంగా తీవ్ర చర్చనీయాంశంగా మారింది. ఈ ప్రభావం ఇంకా గరిష్ఠ స్థాయికి చేరకముందే సముద్ర ఉష్ణోగ్రతలు, ప్రపంచ సగటు ఉష్ణోగ్రతలపై గణనీయమైన ప్రభావం కనిపిస్తోందని శాస్త్రవేత్తలు స్పష్టం చేస్తున్నారు.
ఎల్ నినో సమయంలో పసిఫిక్ మహాసముద్రంలో నిల్వ ఉన్న అదనపు వేడిలో కొంత భాగం వాతావరణంలోకి విడుదలవుతుంది. దీనివల్ల ఇప్పటికే పెరుగుతున్న భూతాపం (గ్లోబల్ వార్మింగ్) తోడుగా ప్రపంచ సగటు ఉష్ణోగ్రతలు మరింతగా పెరిగే అవకాశం ఉంది. ప్రస్తుతం ఏర్పడుతున్న ఎల్ నినో.. చరిత్రలోనే అత్యంత బలమైన వాటిలో ఒకటిగా మారే అవకాశముందని పలు అంచనాలు వెల్లడిస్తున్నాయి.
ముఖ్యంగా 2026 చివరి నెలల్లో, 2027 ప్రారంభంలో దీని ప్రభావం గరిష్ఠ స్థాయిలో ఉండవచ్చని అంచనా వేస్తున్నారు. దీంతో 2027వ సంవత్సరం ప్రపంచ చరిత్రలోనే అత్యధిక ఉష్ణోగ్రతలు నమోదయ్యే అత్యంత వేడి సంవత్సరంగా మారే ప్రమాదం ఉందని వాతావరణ నిపుణులు హెచ్చరిస్తున్నారు.
ఎల్ నినో కేవలం ఉష్ణోగ్రతలను మాత్రమే కాకుండా, ప్రపంచవ్యాప్తంగా వర్షపాత సరళిని కూడా తీవ్రంగా మార్చేస్తుంది. దీనివల్ల కొన్ని ప్రాంతాల్లో అతి భారీ వర్షాలు, ఆకస్మిక వరదలు ముంచెత్తితే.. మరికొన్ని ప్రాంతాల్లో తీవ్ర కరవు పరిస్థితులు, ఎండల తీవ్రత పెరిగే ముప్పు ఉంది. భారత్ సహా పలు దేశాలపై దీని ప్రభావం ఏ స్థాయిలో ఉండబోతుందనే అంశాన్ని శాస్త్రవేత్తలు నిరంతరం నిశితంగా పరిశీలిస్తున్నారు.
Leave a Reply