“ఇమ్రాన్ ఖాన్‌ను కనుమరుగు చేసే కుట్ర జరుగుతోందా..?” పాకిస్తాన్‌పై నేరుగా ప్రశ్నల వర్షం కురిపించిన ఇంగ్లాండ్ మాజీ కెప్టెన్.! క్రికెట్ ప్రపంచంలో ఒక్కసారిగా చెలరేగిన కొత్త వివాదం.. అసలేం జరిగింది.?

పాకిస్తాన్ మాజీ క్రికెట్ కెప్టెన్, ఆ దేశ మాజీ ప్రధాని ఇమ్రాన్ ఖాన్ ఆరోగ్య పరిస్థితి, జైలులో ఆయనకు అందుతున్న వైద్య సదుపాయాలపై క్రికెట్ ప్రపంచం దృష్టి మరోసారి మళ్లింది.

ఇమ్రాన్ ఖాన్‌కు తగిన వైద్య చికిత్స అందించాలని కోరుతూ 21 మంది అంతర్జాతీయ మాజీ క్రికెటర్లు పాకిస్తాన్ అధికారులకు విజ్ఞప్తి చేశారు.

ఈ బృందంలో ఇంగ్లాండ్ మాజీ కెప్టెన్ మైకేల్ అథర్టన్ కూడా ఉన్నారు. ఇది కేవలం సాధారణ వైద్య చికిత్సకు సంబంధించిన విజ్ఞప్తి మాత్రమే కాదని, ఇమ్రాన్ ఖాన్‌ను ప్రజా జీవితం నుంచి క్రమంగా కనుమరుగు చేసే ప్రయత్నం జరుగుతోందన్న ఆందోళన కూడా ఉందని ఆయన పేర్కొన్నారు.

ఇమ్రాన్ ఖాన్ 2023 నుంచి జైలు జీవితం గడుపుతున్నారు. అవినీతి కేసుల్లో ఆయన దోషిగా తేలగా, ఆ ఆరోపణలను ఆయన నిరంతరం ఖండిస్తూనే వస్తున్నారు. ఈ క్రమంలో ఆయన ఆరోగ్యంపై ఆందోళనలు మరింత తీవ్రమవుతున్నాయి. ఇటీవల ఆయన కంటి సమస్యకు సంబంధించిన అంశం కూడా విస్తృతంగా చర్చనీయాంశమైంది.

ఈ అంశంపై పాక్ ప్రభుత్వానికి విజ్ఞప్తి చేసిన లేఖపై భారత క్రికెట్ మాజీ కెప్టెన్లు కపిల్ దేవ్, సునీల్ గవాస్కర్, దిలీప్ వెంగ్‌సర్కార్ తదితరులు కూడా సంతకాలు చేశారు. ఇది పాకిస్తాన్ న్యాయవ్యవస్థ లేదా అంతర్గత వ్యవహారాల్లో జోక్యం చేసుకునే ప్రయత్నం కాదని, ఒక ఖైదీగా ఆయనకు దక్కాల్సిన కనీస ప్రాథమిక వసతులు, సరైన వైద్య చికిత్స అందాలన్నదే తమ ఉద్దేశమని కపిల్ దేవ్ స్పష్టం చేశారు.