అసోం రాష్ట్రంలో జనాభా గణన (సెన్సస్) విధుల సందర్భంగా ఒక మహిళా ఉపాధ్యాయురాలు తన కవల పిల్లలిద్దరినీ వెంటబెట్టుకుని ఇంటింటికీ వెళ్లి ఫీల్డ్ వర్క్ చేసిన వీడియో ప్రస్తుతం సోషల్ మీడియాలో విపరీతంగా వైరల్ అవుతూ ప్రశంసలు అందుకుంటోంది.
రూమీ దేకా అనే ఆ ఉపాధ్యాయురాలు ఒక చిన్నారిని చంకన ఎత్తుకుని, మరో చిన్నారి చేయి పట్టుకుని ఇళ్లకు వెళ్లి వివరాలు సేకరిస్తున్న దృశ్యం చూసేవారిని ఆశ్చర్యానికి గురిచేస్తోంది. మండుటెండ, సుదూర ప్రయాణాల నడుమ కూడా తన అధికారిక విధులను ఏమాత్రం నిర్లక్ష్యం చేయకుండా నిర్వర్తించిన ఆమె అంకితభావం నెటిజన్ల హృదయాలను కదిలిస్తోంది.
ఈ ఘటనపై నెట్టింట పలువురు రకరకాలుగా స్పందిస్తున్న వేళ, ఆమె భర్త స్పందించి అసలు విషయాన్ని స్పష్టం చేశారు. సాధారణ పాఠశాల బోధనా విధుల కంటే ఈ జనాభా గణన పనులు భిన్నమైనవని, విభిన్న ప్రాంతాలకు వెళ్లి ఫీల్డ్ వర్క్ చేయాల్సి రావడంతో వేరే గత్యంతరం లేక పిల్లలను వెంట తీసుకెళ్లాల్సి వచ్చిందని ఆయన వివరించారు. కేవలం చిన్న వీడియో క్లిప్ను మాత్రమే చూసి మొత్తం పరిస్థితిని తప్పుగా అర్థం చేసుకోవద్దని ఆయన ప్రజలకు విజ్ఞప్తి చేశారు.
2011 తర్వాత సుదీర్ఘ విరామం అనంతరం భారతదేశంలో పూర్తి స్థాయి జనాభా గణన పనులు ప్రారంభమయ్యాయి. పైగా ఈసారి పూర్తిగా మొబైల్ యాప్ల ద్వారా డిజిటల్ పద్ధతిలో డేటా సేకరిస్తుండటం విశేషం. ఈ జాతీయ స్థాయి బృహత్తర కార్యక్రమంలో క్షేత్రస్థాయిలో దిగి అహర్నిశలు శ్రమిస్తున్న ఎందరో సిబ్బంది కష్టాన్ని ఈ ఘటన ప్రతిబింబిస్తూ నెట్టింట ప్రధాన చర్చనీయాంశంగా మారింది.
Leave a Reply