దేశాన్ని కుదిపేసిన వరదలు.. సద్గురును కంటతడి పెట్టించిన భూకంపం..! నేపాల్ వరద బాధితులకు రూ.1 కోటి సహాయం ప్రకటించిన ఈశా సద్గురు!

నేపాల్‌లో సంభవించిన తీవ్ర వరదలు, విపత్తు దృష్ట్యా ఈశా ఫౌండేషన్ వ్యవస్థాపకులు సద్గురు జగ్గీ వాసుదేవ్ కీలక ప్రకటన చేశారు.

ఖాట్మండులో జరిగిన ‘సాలిడారిటీ విత్ నేపాల్’ (నేపాల్‌కు సంఘీభావం) కార్యక్రమంలో పాల్గొన్న ఆయన, నేపాల్ ప్రధానమంత్రి విపత్తు సహాయ నిధికి రూ.1 కోటి విరాళం అందిస్తున్నట్లు ప్రకటించారు. ఈ విపత్తును నేపాల్ ఒక్కటే ఒంటరిగా ఎదుర్కోలేదని, హిమాలయ ప్రాంత దేశాలన్నీ ఐక్యంగా కలిసి పనిచేయాలని ఆయన స్పష్టం చేశారు.

ఈ వరద బీభత్సంలో 900 మందికి పైగా ప్రాణాలు కోల్పోగా, వేలాది మంది గల్లంతైనట్లు సమాచారం. గల్లంతైన వారిలో ఈశా ఫౌండేషన్ కైలాస యాత్రకు వెళ్లిన 77 మంది యాత్రికులు, నేపాల్ ప్రాంతానికి చెందిన 3 మంది ఈశా వాలంటీర్లు కూడా ఉన్నట్లు తెలిసింది. ఈ నేపథ్యంలో భారత్, చైనా, పాకిస్తాన్, నేపాల్, భూటాన్ అనే 5 దేశాలు కలిసి ‘హిమాలయన్ బోర్డు’ వంటి ఒక ఉమ్మడి వేదికను ఏర్పాటు చేయాలని సద్గురు ప్రతిపాదించారు.

హిమాలయాలు కేవలం దేశాల సరిహద్దులకే పరిమితమైనవి కావని, వాటి పరిరక్షణ అన్ని దేశాల ఉమ్మడి బాధ్యత అని సద్గురు పేర్కొన్నారు. రాజకీయ విభేదాలను పక్కనపెట్టి హిమాలయాలకు సంబంధించిన సమస్యలపై ఈ దేశాలు కలిసి చర్చించి చర్యలు చేపట్టాలని సూచించారు. హిమాలయాలు ఎంతో సుందరమైనవి మాత్రమే కాక, అత్యంత సున్నితమైన పర్యావరణ వ్యవస్థను కలిగి ఉన్నందున, భవిష్యత్ తరాల కోసం వాటిని కాపాడుకోవడం అత్యవసరమని ఆయన అన్నారు. దీనిని కేవలం ఒక్క దేశ సమస్యగా మాత్రమే చూడకూడదని తెలిపారు.

ప్రకృతి వైపరీత్యాలు సంభవించిన తర్వాత స్పందించడం కంటే, ముందస్తు సన్నద్ధతతో ఉండటం ఎంతో ముఖ్యమని సద్గురు పేర్కొన్నారు. నేపాల్‌లో జరిగిన నష్టం ఊహించిన దానికంటే చాలా ఎక్కువగా ఉందని, ఇలాంటి విపత్కర పరిస్థితులను ఎదుర్కొనేందుకు అన్ని దేశాలు సమన్వయంతో కృషి చేయాలని పిలుపునిచ్చారు. విపత్తులను కేవలం దైవిక కారణాలతో ముడిపెట్టకుండా, ప్రకృతి పరిణామాల వెనుక ఉన్న శాస్త్రీయ కారణాలను అర్థం చేసుకుని వ్యవహరించాలని ఆయన స్పష్టం చేశారు. అలాగే, బాధితులకు అండగా కోయంబత్తూరులోని ఈశా యోగా కేంద్రంలో ప్రత్యేక కార్యక్రమాన్ని నిర్వహించనున్నట్లు సద్గురు ప్రకటించారు.