చైనాలో తగ్గుతున్న షీ జిన్‌పింగ్ అధికారం.. ఇకపై మొత్తం కంట్రోల్ సైన్యం చేతుల్లోకే.. దాడులకు ఇకపై అధ్యక్షుడి అనుమతి అవసరం లేదా..? అమల్లోకి వస్తున్న సరికొత్త నిబంధనలు!

చైనా తన సైనిక బలగాల నిర్వహణకు సంబంధించిన నిబంధనలలో కీలక మార్పులు చేసింది. కొత్త నిబంధనల ప్రకారం, ఇతర దేశాలపై చేపట్టే ప్రతీకార లేదా ప్రతిఘటన చర్యలకు ప్రతిసారీ అధ్యక్షుడి ముందస్తు అనుమతి తీసుకోవాల్సిన అవసరం ఉండదు.

యుద్ధక్షేత్రంలో ఉన్న ఆర్మీ కమాండర్లు అక్కడి పరిస్థితులకు అనుగుణంగా తమ స్థాయిలోనే తక్షణ నిర్ణయాలు తీసుకోవచ్చని వెల్లడించారు. ఈ కొత్త నిబంధనలు అక్టోబర్ 1 నుంచి అమల్లోకి రానున్నట్లు చైనా అధికారిక మీడియా పేర్కొంది.

సుమారు 16 ఏళ్ల తర్వాత చైనా తన సైనిక విస్తరణ చట్టాల్లో ఈ మార్పులను తీసుకొచ్చింది. 82 సెక్షన్లతో రూపొందించిన ఈ నూతన చట్టంలో అధ్యక్షుడు, సైనిక నాయకత్వం మరియు యుద్ధభూమిలో పోరాడే సైనికుల అధికారాల గురించి సమగ్రంగా వివరించారు. ముఖ్యంగా, ప్రతీకార చర్యలకు సంబంధించిన నిర్ణయాధికార ప్రక్రియలో మార్పులు చేశారు. చర్యలు తీసుకున్న అనంతరం ఆ వివరాలను అధ్యక్షుడు మరియు శాసనసభకు నివేదించాల్సి ఉంటుందని పేర్కొన్నారు.

యుద్ధ పరిస్థితులు ఏర్పడితే సోషల్ మీడియాపై కూడా ఆంక్షలు విధించేందుకు కొత్త నిబంధనలు వీలు కల్పిస్తున్నాయి. తప్పుడు సమాచారం లేదా వివాదాస్పద పోస్టులు వ్యాపించకుండా అడ్డుకోవడానికి సోషల్ మీడియా ప్లాట్‌ఫారమ్‌లను నియంత్రించేందుకు, అవసరమైన చర్యలు తీసుకునేందుకు ప్రభుత్వం మరియు సైన్యానికి పూర్తి అధికారాలు కల్పించారు. అంతేకాకుండా, యుద్ధ సమయాల్లో రవాణా, టెలికమ్యూనికేషన్స్, కమ్యూనికేషన్ నెట్‌వర్క్, ఇంధనం, ఆరోగ్యం, ఆహారం మరియు వాణిజ్యం వంటి కీలక రంగాల కార్యకలాపాలపై కూడా సైన్యం పూర్తి నియంత్రణను అమలు చేయవచ్చు.

తైవాన్, జపాన్ మరియు ఫిలిప్పీన్స్ వంటి దేశాలతో ప్రాంతీయ ఉద్రిక్తతలు పెరుగుతున్న నేపథ్యంలో చైనా ఈ కొత్త సైనిక నిబంధనలను తీసుకువచ్చింది. అదే సమయంలో, సైన్యంలో చేరడానికి అవసరమైన వయోపరిమితిలో ఎలాంటి మార్పులు చేయలేదు. యుద్ధ సహాయక చర్యలు మరియు రక్షణ కార్యక్రమాలలో పాల్గొనే వారిని సైన్యంలో చేర్చుకోకూడదని కూడా కొత్త నిబంధనలలో స్పష్టం చేశారు. ఈ మార్పులు చైనా యుద్ధకాల పరిపాలన మరియు సైనిక నిర్ణయాధికార ప్రక్రియలో గణనీయమైన మార్పులకు దారితీయవచ్చని విశ్లేషకులు భావిస్తున్నారు.