60 గంటల పోరాటం..! బురదలో పూర్తిగా కూరుకుపోయినా ప్రాణాలతో బయటపడ్డ 6 ఏళ్ల చిన్నారి.. బతికి బయటపడ్డ అద్భుత శిశువు.. నేపాల్ వరదల భయానక రూపం.. అక్కున చేర్చుకుని కాపాడిన ఆర్మీ.. కంటతడి పెట్టిస్తున్న వీడియో!

నేపాల్‌లోని రసువా ప్రాంతంలో సంభవించిన భీకర వరదల్లో శిథిలాల కింద చిక్కుకుపోయిన 6 ఏళ్ల చిన్నారి, ఏకంగా 60 గంటల తర్వాత ప్రాణాలతో సురక్షితంగా బయటపడటం ఒక అద్భుతంగా నిలిచింది.

శిథిలాల మధ్య నుంచి చిన్నారి ఏడుపు శబ్దం వినిపించడంతో అప్రమత్తమైన సాయుధ పోలీసు బలగాలు (APF) ఆ పాపను రక్షించడమే కాకుండా, తీవ్ర గాయాలతో ఆసుపత్రిలో చికిత్స పొందుతున్న ఆమె తల్లిదండ్రులను గుర్తించి వారిని ఒక్కటి చేశాయి.

రసువా పరిధిలోని గోసైన్‌కుండ రూరల్ మున్సిపాలిటీకి చెందిన తిమురే ప్రాంతంలో గత శుక్రవారం సాయంత్రం రెస్క్యూ సిబ్బంది ముమ్మరంగా గాలింపు చర్యలు చేపట్టారు. ఆ సమయంలో బురద, శిథిలాల కింద నుంచి చిన్నారి ఏడుస్తున్న సన్నని మూలుగుల శబ్దం వినిపించింది. వెంటనే అప్రమత్తమైన తిమురే సరిహద్దు పోస్ట్ ఏపీఎఫ్ రెస్క్యూ బృందం ఆ ప్రదేశానికి పరుగుతీసింది.

మనీషా (6)గా గుర్తించిన ఆ చిన్నారి శరీరం దాదాపు పూర్తిగా బురదలో కూరుకుపోయింది. అదృష్టవశాత్తూ ఆమెపై ఒక చెక్క దిమ్మె లేదా చెక్క నిర్మాణం పడటంతో, తల భాగం మాత్రం బురదలో కూరుకుపోకుండా తప్పించుకోగలిగింది. ఆ చెక్క దిమ్మె సందుల్లోంచి వచ్చిన చిన్నారి రోదనల ఆధారంగానే సిబ్బంది బురదను తవ్వి పాపను ప్రాణాలతో బయటకు తీశారు.

మనీషాను రక్షించిన సమయంలో ఆమె అపస్మారక, అత్యంత విషమ స్థితిలో ఉంది. వెంటనే తిమురే సరిహద్దు భద్రతా పోస్టుకు తరలించి ప్రథమ చికిత్స అందించి, శరీర ఉష్ణోగ్రతను సాధారణ స్థాయికి తెచ్చే ప్రయత్నం చేశారు. రాత్రంతా అక్కడ పర్యవేక్షించిన అనంతరం, ఆర్మీ హెలికాప్టర్ ద్వారా మెరుగైన చికిత్స కోసం ఖాట్మండులోని ఆసుపత్రికి తరలించారు.

మరోవైపు చిన్నారి కుటుంబ సభ్యుల ఆచూకీ కోసం వెతికిన సిబ్బందికి, ఆమె తల్లిదండ్రులు కూడా ప్రాణాలతో బయటపడినట్లు విచారణలో తెలిసింది. మనీషా తల్లి గీత ఒక బ్యాంకులో ఉద్యోగిగా పనిచేస్తున్నట్లు గుర్తించారు. వరద ప్రవాహంలో కొట్టుకుపోయిన ఆమె తల్లిదండ్రులు, నీటి ఉధృతికి ఒక గోడను బలంగా ఢీకొని అదృష్టవశాత్తూ ప్రాణాలు దక్కించుకున్నారు. వరదలు వచ్చిన 60 గంటల తర్వాత తమ కూతురు ప్రాణాలతో దొరికిందన్న వార్త విని ఆ తల్లిదండ్రులు భావోద్వేగానికి గురయ్యారు. ప్రస్తుతం మనీషా, ఆమె తల్లిదండ్రులు ఒకే ఆసుపత్రిలో చికిత్స పొందుతున్నారు.

ఈ అద్భుత రెస్క్యూ ఆనందాన్ని నింపినప్పటికీ, రక్షణ చర్యల్లో పాల్గొన్న భద్రతా బలగాల్లో తీరని విషాదం మిగిలింది. మనీషాను రక్షించిన అదే తిమురే సరిహద్దు పోస్టులో విధుల్లో ఉన్న తొమ్మిది మంది ఏపీఎఫ్ జవాన్లు ఈ వరద విపత్తులో ఇంకా గల్లంతై ఉండటం తీవ్ర ఆందోళన కలిగిస్తోంది. ప్రకృతి విలయతాండవంలోనూ మొక్కవోని ధైర్యం, మానవత్వంతో సాగించిన ఈ సాహసోపేత రెస్క్యూ ఆపరేషన్ అందరి హృదయాలను కదిలిస్తోంది.