మెడలోతు నీరు..! “ప్రమాదకరమైన నదిలోకి దిగితేనే శ్మశానానికి చేరుకోగలం”.. భుజాలపై 20 ఏళ్ల యువతి మృతదేహాన్ని మోస్తూ నదిని ఈదుకుంటూ వెళ్లిన జనం.. కంటతడి పెట్టిస్తున్న దారుణ ఘటన!

దేశానికి స్వాతంత్ర్యం వచ్చి ఇన్నేళ్లయినా గ్రామీణ ప్రాంతాల్లో కనీస మౌలిక వసతులు ఏ స్థాయిలో ఉన్నాయో చెప్పడానికి బిహార్‌లో చోటుచేసుకున్న ఈ ఘటనే ప్రత్యక్ష నిదర్శనం.

బిహార్‌లోని కిషన్‌గంజ్ జిల్లా బహదూర్‌గంజ్ నియోజకవర్గంలో రోడ్డు, వంతెన సదుపాయం లేకపోవడంతో చనిపోయిన వారి మృతదేహాలను సైతం నదిని ఈదుకుంటూ తీసుకెళ్లి అంత్యక్రియలు నిర్వహించాల్సిన దుస్థితి నెలకొంది.

బహదూర్‌గంజ్ బ్లాక్ పరిధిలోని పీర్‌పూర్ గ్రామానికి చెందిన 20 ఏళ్ల యువతి సహన్‌సవి బేగం ఇటీవల జరిగిన రోడ్డు ప్రమాదంలో దుర్మరణం చెందింది. ఆమె మృతదేహాన్ని అంత్యక్రియల నిమిత్తం బైసా శ్మశానవాటికకు తీసుకెళ్లాల్సి వచ్చినప్పుడు, స్థానికులు ఏళ్ల తరబడి ఎదుర్కొంటున్న దయనీయ వాస్తవం మరోసారి వెలుగులోకి వచ్చింది.

నోధియా టోలీ – బైసా ఘాట్ పరిధిలోని కక్వా నదిపై వంతెన లేకపోవడంతో, గ్రామస్తులు తమ బంధువైన యువతి మృతదేహాన్ని భుజాలపై మోసుకుంటూ ప్రమాదకరమైన నదిలోకి దిగి ఈదుకుంటూ వెళ్లాల్సి వచ్చింది. నదిలోని వేగవంతమైన ప్రవాహాన్ని, లోతైన నీటిని దాటితేనే తప్ప శ్మశానవాటికను చేరుకోలేని దుర్భర పరిస్థితి అక్కడ నెలకొంది.

దాదాపు 50 ఎకరాల విస్తీర్ణంలో ఉన్న ఈ బైసా శ్మశానవాటిక నోధియా టోలీ, సక్‌సక్కీ, జీంగాకట్టా, ధోకాచి తదితర గ్రామాల ప్రజలకు తరతరాలుగా అంత్యక్రియలు జరిపే ప్రధాన స్థలం. ఎండాకాలంలో ఎలాగోలా నెట్టుకొచ్చినా, వర్షాకాలంలో నది ఉధృతంగా ప్రవహిస్తున్నప్పుడు ప్రజలు తీవ్ర ప్రాణభయంతో ఈ ప్రయాణం చేయాల్సి వస్తోంది.

గౌరవప్రదంగా సాగాల్సిన అంతిమయాత్ర కూడా నీటి ప్రవాహంతో పోరాడే భయానక దృశ్యంగా మారడం గ్రామస్తులను తీవ్ర ఆవేదనకు గురిచేస్తోంది. ఈ సమస్యపై అధికారులకు, మంత్రులకు పలుమార్లు వినతిపత్రాలు సమర్పించినప్పటికీ కేవలం ‘హామీలకే’ పరిమితమయ్యాయని స్థానికులు వాపోతున్నారు.

క్షేత్రస్థాయి పరిస్థితిని పరిశీలించిన జిల్లా పరిషత్ ప్రతినిధి ఇమ్రాన్ ఆలం, ఈ సమస్యను బిహార్ గ్రామీణాభివృద్ధి శాఖ మంత్రి సునీల్ కుమార్ దృష్టికి కూడా తీసుకెళ్లినట్లు తెలిపారు. అయినప్పటికీ ఇప్పటివరకు ఎలాంటి స్పష్టమైన చర్యలు తీసుకోలేదు.

“దేశానికి స్వాతంత్ర్యం వచ్చి దాదాపు 80 ఏళ్లు గడుస్తున్నా, కనీసం అంతిమయాత్ర కోసం కూడా వంతెన లేక నదిలోకి దిగాల్సి రావడం ఏ రకమైన అభివృద్ధి?” అని స్థానికులు తీవ్ర ఆగ్రహం వ్యక్తం చేస్తున్నారు. కిషన్‌గంజ్ జిల్లా కలెక్టర్‌తో పాటు బిహార్ ప్రభుత్వం వెంటనే స్పందించి నోధియా టోలీ – బైసా ఘాట్ ప్రాంతంలో కక్వా నదిపై బ్రిడ్జి నిర్మించాలని గ్రామస్తులు కన్నీళ్లతో వేడుకుంటున్నారు.