అమెరికాలో పనిచేస్తున్న హెచ్-1బీ వీసాదారుల జీవిత భాగస్వాములకు కల్పిస్తున్న హెచ్-4 వర్క్ పర్మిట్ (H-4 EAD)ను రద్దు చేసేందుకు ట్రంప్ యంత్రాంగం నూతన ప్రతిపాదనను సిద్ధం చేసింది.
గత పదేళ్లకు పైగా అమల్లో ఉన్న ఈ విధానాన్ని మార్చేందుకు హోమ్ల్యాండ్ సెక్యూరిటీ విభాగం రూపొందించిన ఈ ప్రతిపాదన.. అమెరికాలోని లక్షలాది భారతీయ కుటుంబాలనే కాకుండా, భారతదేశంలోని పెళ్లిళ్ల మార్కెట్ను, మరీ ముఖ్యంగా “అమెరికా సంబంధాల” కట్నకానుకల డిమాండ్ను తలకిందులు చేయడం మొదలుపెట్టింది.
అమెరికా ప్రభుత్వ అధికారిక గణాంకాల ప్రకారం, H-4 వర్క్ పర్మిట్ పొందిన వారిలో 93 శాతం మంది భారతీయులే; అందులో 94 శాతం మంది మహిళలు. మంచి విద్యా నిపుణత, ప్రతిభ ఉన్న భారతీయ మహిళలు అమెరికా వెళ్లిన తర్వాత కూడా చట్టబద్ధంగా ఉద్యోగం చేసుకుంటూ, కుటుంబ ఆదాయానికి చేదోడువాదోడుగా నిలిచేందుకు ఈ వీసా ఎంతో ఉపయోగపడింది. అయితే, ఈ పని హక్కును రద్దు చేస్తే.. భారతీయ ఐటీ వరుల హవా నడిచే పెళ్లిళ్ల కట్నాల మార్కెట్ తీవ్ర తిరోగమనాన్ని ఎదుర్కొనే పరిస్థితి ఏర్పడింది.
ఈ వీసా మార్పు ప్రభావం చెన్నై, హైదరాబాద్, గుజరాత్ వంటి కీలక ప్రాంతాల్లో స్పష్టంగా కనిపిస్తోంది. తెలుగు రాష్ట్రాల్లో డాలర్ల ఆదాయం, ఇద్దరి సంపాదనను చూసి ఇస్తూ వచ్చిన కోట్ల రూపాయల కట్న కానుకల బేరసారాలు ఇప్పుడు గణనీయంగా తగ్గడం ప్రారంభించాయి. చెన్నైలో తమ కుమార్తెల కెరీర్కు ప్రాధాన్యతనిచ్చే తల్లిదండ్రులు.. ఉద్యోగం చేసుకునే హక్కు లేని H-4 వీసాతో అమెరికా వెళ్లి నాలుగు గోడల మధ్య బందీ అవ్వడం కంటే, భారతదేశంలోనే స్థిరపడిన స్వదేశీ ఐటీ సంబంధాలకే ఎక్కువ మొగ్గు చూపుతున్నారు. అదేవిధంగా, ఒకరి సంపాదనతో అమెరికాలో నెట్టుకురావడం కష్టమని గ్రహించిన గుజరాతీ సమాజం కూడా అత్యంత అప్రమత్తతతో వ్యవహరిస్తోంది.
అమెరికాలో జీవన వ్యయం, ఇంటి అద్దెలు, వైద్య బీమా, పిల్లల చదువుల ఖర్చులు విపరీతంగా పెరిగిపోయిన పరిస్థితుల్లో భార్యాభర్తలిద్దరూ పనిచేస్తేనే కుటుంబాన్ని నెట్టుకురావడం సాధ్యమవుతుంది. H-4 వర్క్ పర్మిట్ రద్దుతో పాటు, కొత్త H-1B ఉద్యోగులకు సంబంధించిన వీసా రుసుముల పెంపు, ఉద్యోగం కోల్పోతే లభించే 60 రోజుల గ్రేస్ పీరియడ్ను రద్దు చేసే ఆలోచనలు అమెరికా కొలువుల భద్రతనే ప్రశ్నార్థకంగా మార్చాయి. ఈ నిబంధన ప్రస్తుతానికి ప్రతిపాదన దశలోనే ఉన్నప్పటికీ.. నెలకొన్న వీసా అనిశ్చితి భారత వివాహ విపణిలో దశాబ్దాలుగా వేళ్లూనుకుపోయిన ‘అమెరికా అల్లుడు’ వ్యామోహాన్ని పటాపంచలు చేసింది.
Leave a Reply